کراچی کے سات بڑے سرکاری ہسپتالوں کی گیس منقطع کرنے کی تیاری مکمل

ہاسپٹلز نے متعدد نوٹس کے باوجود کوئی پیش رفت نہیں کی، 10 اکتوبر کو حتمی مہلت ختم ہوجائے گی، سوئی سدرن گیس کمپنی (فوٹو : فائل)

---

لاہور:

سوئی سدرن گیس کمپنی نے واجبات کی عدم ادائیگی پر کراچی کے سات بڑے ہسپتالوں کی گیس منقطع کرنے کی تیاری مکمل کرلی، 10 اکتوبر کو ہسپتالوں کو دی گئی مہلت ختم ہوجائے گی۔

سوئی سدرن گیس کمپنی کے ترجمان کے مطابق گیس کے نادہندہ کراچی کے سات بڑے سرکاری ہسپتالوں کو واجبات کی ادائیگی کے لیے دی جانے والی مہلت 10 اکتوبر کو ختم ہوجائے گی جس کے بعد ان ہسپتالوں کی بجلی منقطع کردی جائے گی۔

ترجمان کے مطابق کمپنی نے گیس کا بل ادا نہ کرنے والے سرکاری ہسپتالوں کے خلاف کاررواٸی کا فیصلہ کرتے ہوئے کراچی کے سات بڑے سرکاری ہسپتالوں کی گیس کاٹنے کی تیاری مکمل کرلی ہیں، ان ہسپتالوں کو مزید مہلت دے دی گٸی ہے، اگر 10 اکتوبر تک واجبات ادا نہ ہوٸے تو گیس منقطع کردی جائے گی اور سارے ڈیفالٹر کے خلاف بلا امتیاز کاررواٸی کی جائے گی۔

ترجمان کا کہنا ہے کہ نادہندہ ہسپتالوں میں کراچی سول ہسپتال کا ٹراما سینٹر، سندھ گورنمنٹ ہاسپٹلز، سول سروسز ہسپتال نزد خالقدینا ہال اور آٸی سی یو ٹراما سینٹر اینڈ کارڈک سینٹر کورنگی 5 نمبر شامل ہیں جنہیں کئی نوٹسز دیے گئے لیکن کوئی پیش رفت سامنے نہیں آئی۔

ترجمان نے مزید کہا ہے کہ این آٸی سی ایچ پر 52 لاکھ 61 ہزار 37 روپے، عبدالمجید صحبیانی ہسپتال کھوکھرا پار پر 26 لاکھ 53 ہزار روپے، آٸی سی یو ٹراما اینڈ کارڈک سینٹر کورنگی 5 نمبر پر 33 لاکھ 11 روپے، کراچی سول ہسپتال کے ٹراما سینٹر پر 2 کروڑ 78 لاکھ 86 ہزار روپے، سندھ گورنمنٹ ہسپتال نارتھ کراچی پر 26 لاکھ 32 ہزار روپے، سول سرجن ہسپتال ایم اے جناح روڈ پر 33 لاکھ 98 ہزار سے زاٸد کی رقم واجب الادا ہے۔