اگر استعفیٰ نہ دیتا تو بڑا مسئلہ ہوجاتا وقار یونس

2سال میں پیس بیٹری تیار کردی،کسی عہدے کیلیے خود کو موزوں سمجھا توپھر درخواست جمع کراؤں گا، سابق بولنگ کوچ۔ فوٹو: فائل

---

وقار یونس کا کہنا ہے کہ پی سی بی میں نئی ٹیم کیلیے راستہ صاف کردینا ہی مناسب فیصلہ تھا لہٰذا اگر استعفٰی نہ دیتا تو شاید بڑا مسئلہ ہوجاتا۔

پاکستان کرکٹ کی سب سے بڑی ویب سائٹ www.cricketpakistan.com.pkکے پروگرام ''کرکٹ کارنر ود سلیم خالق'' میں گفتگو کرتے ہوئے قومی ٹیم کے سابق بولنگ کوچ وقار یونس نے کہا کہ فیملی سے دوری اور کورونا جیسے مسائل تو تھے پھر جب پی سی بی میں نئے چیئرمین آئے تو لگ رہا تھا کہ وہ نیا سیٹ اپ اور لوگ لانا چاہ رہے ہیں،اس صورتحال میں مناسب یہی تھا کہ استعفٰی دے دیتا، مصباح الحق کے بعد میں نے بھی فیصلہ کرلیا۔

ورلڈکپ سے قبل اچانک کوچنگ چھوڑنے پر قومی ٹیم کے ممکنہ مسائل پر انھوں نے کہا کہ اگر استعفٰی نہ دیتا تو شاید اس سے بھی بڑے مسائل ہوتے،میں پی سی بی اور کرکٹ کے معاملات کو اچھی طرح جانتا ہوں،روایت بھی یہی ہے کہ کسی تبدیلی کی صورت میں ایسا ہی ہوتا ہے،اسی لیے کہوں گا کہ بورڈ اور ملک کیلیے یہی دانشمندانہ فیصلہ تھا،نئے لوگوں کیلیے جگہ چھوڑ دینا چاہیے تاکہ وہ اپنے پلانز پر عمل درآمد کرسکیں، بہتر نہیں کہ رونا دھونا شروع کردیا جائے۔

شاہین شاہ آفریدی اور حسن علی کی جانب سے کوچنگ کی ستائش کے سوال پر سابق کپتان نے کہا کہ پیسرز سیکھنے کی کوشش کرتے اورمل کر اچھی سمت میں جا رہے تھے،یہ دونوں ورلڈکلاس پلیئرز ہیں اور ورلڈکپ میں پاکستان کی قوت ہوں گے،میں ان کے مستقبل کیلیے نیک خواہشات کا اظہار کرتا ہوں۔

انھوں نے کہا کہ میں قومی ٹیم سے وابستگی کے دور میں میڈیا پر بہت کم آیا،مجھے اپنی کوششوں سے آگاہ کرنا چاہیے تھا مگر میں خاموشی کے ساتھ پوری ایمانداری سے ذمہ داری نبھانے میں مصروف رہا، مصباح الحق اور میں نے جب کوچنگ سنبھالی تو ہمارے پاس بیشتر انڈر19بولرز تھے، شاہین شاہ آفریدی اور حسن علی کے ساتھ اب حارث رؤف بھی ہیں، نسیم شاہ کی حالیہ کارکردگی متاثر کن ہے،اگر فٹنس مسائل نہ ہوں تو عمر بڑھنے کے ساتھ جسم مضبوط ہونے پر وہ ٹیم کا بڑا اثاثہ ثابت ہوسکتے ہیں،حسن علی کے آنے سے محمد حسنین تھوڑا پیچھے چلے گئے مگر وہ اپنی صلاحیتوں کا لوہا منواسکتے ہیں،2سال میں اچھی پیس بیٹری بن گئی،میں اپنے کام پر فخر محسوس کرتا ہوں،مجھے کوئی پچھتاوا نہیں ہے۔

رمیز راجہ کی جانب سے دوبارہ کام کی پیشکش قبول کرنے کے سوال پر وقار یونس نے کہا اگر پی سی بی میں کوئی اسامی خالی ہو اور فیصلہ ساز سمجھیں کہ میں اس کام کیلیے موزوں ہوں تو بھاگوں کا نہیں،یہ میرا حق ہے اورمیں ذمہ داری لینے کیلیے تیار ہوں گا۔

کرکٹرزکاایک دوسرے کیلیے غیر مہذب الفاظ استعمال کرنا مناسب نہیں ، وقار

وقاریونس نے شعیب اختراورعاقب جاوید کے بھاگ جانے اور کوچنگ سیکھنے کے بیانات کو بچکانہ قرار دے دیا،انھوں نے کہاکہ ہمیں ایک دوسرے کی عزت کرنا چاہیے مگر جب کوئی ذرا سا دباؤ میں آتا ہے تو اس طرح کے الفاظ کہے جاتے ہیں،دونوں اچھے کرکٹر تھے، شعیب میری قیادت میں کھیلے بھی ہیں،عمر کے ساتھ انسان سمجھدار ہوتا ہے مگر یہ دونوں شاید ابھی تک بچے ہیں،امید ہے کہ آئندہ سمجھداری کا مظاہرہ کریں گے۔

سابق کپتان نے کہا کہ ان الفاظ سے میری شہرت کو کوئی نقصان نہیں پہنچتا،میں اس طرح کی باتیں سنتا نہیں،سن لوں تو نظر انداز کردیتا ہوں،میں اپنا کام پوری ایمانداری سے کرتا ہوں، اچھے ناقدین بھی ہوتے ہیں،میں ان کی بات سنتا اور فائدہ اٹھاتا ہوں،کرکٹرز کا ایک دوسرے کیلیے غیر مہذب الفاظ استعمال کرنا مناسب نہیں۔

عامراپنا دشمن خود بن گیا،ٹیم سے باہر ہوا تو بیان بازی شروع کردی، وقار

وقار یونس نے کہا ہے کہ محمد عامر کی بیان بازی کی وجہ سمجھ نہیں سکا،پیسر نوعمری میں ہی ایک باصلاحیت کھلاڑی تھے،بعد ازاں اپنے دشمن خود بن گئے، طویل وقفے کے بعد وہ واپس آئے تو انھیں چاہیے تھا کہ سر جھکاکر پاکستان کی خدمت کرتے، ان میں ٹیلنٹ تھا مگر کارکردگی کا گراف نیچے چلا گیا، گذشتہ 15میچزکا ریکارڈ یہی بتا رہا تھا،قومی ٹیم میں پرفارم کرنے والا ہی رہتا ہے،ان کو نکالا تو الزام تراشی شروع کردی، ریڈ بال کے بعد وائٹ بال کرکٹ بھی چھوڑ دی،اگر مجھے ان کے رویے کی سمجھ آجاتی تو شاید کوئی جواب دے سکتا۔