وزیراعظم ہاؤس کا سیکشن آفیسر بن کر لوگوں کو لوٹنے والا گرفتار

ملزم کو عدالت میں پیش کرکے 4 دن کا ریمانڈ حاصل کرلیاگیا، تفتیش میں مزیدانکشافات کی توقع ہے، ایف آئی اے۔(فوٹو: ایکسپریس)

---

ISLAMABAD: ایف آئی اے اینٹی کرپشن سرکل نے خود کو وزیراعظم ہاؤس کا سیکشن آفیسر ظاہر کرکے سادہ لوح افراد کو لوٹنے والے جعل ساز کو گرفتار کر کے وزیراعظم ہاؤس کے جعلی لیڑ ہیڈ، اتھارٹی لیٹرز، این او سیز اور جعلی سرکاری دستاویزات برآمد کرلیں۔

ایف آئی اے حکام کے مطابق فیصل آباد سے تعلق رکھنے والے جعل ساز مصطفیٰ انصاری نے اسلام آباد کے پوش سیکڑ ایف الیون میں دفتر بنا رکھا تھا جو خود کو وزیراعظم ہاؤس کا سکیشن آفیسر ظاہر کرکے مختلف افراد سے جعل سازی کرکے لاکھوں روپے بٹور چکا ہے۔

ملزم 'نیشنل پیس کونسل فار انڑفیتھ ہارمنی' کے نام سے قائم کی گئی خود ساختہ تنظیم کو حکومت پاکستان سے منظور شدہ ظاہر کرکے لاکھوں روپے کے عوض رکنیت سازی اور تنظیم کا عہدے دار بنانے کے عوض لاکھوں روپے وصول کرتا تھا۔

ملزم مختلف افراد سے پیسے لے کر انہیں ذاتی گاڑیوں پر سرکاری نمبر پلیٹ استعمال کرنے کے این او سی (نو آبجیکشن سرٹیفکیٹ) بھی فروخت کرتا تھا۔

ایف آئی اے نے ملزم کی نشان دہی پر اس کے دفتر پر چھاپہ مار کر وزیراعظم ہاؤس کے جعلی لیڑ ہیڈ، اتھارٹی لیٹرز، این او سی، جعلی سرکاری دستاویزات، کمپیوٹر، موبائل فون، پارٹی کی رسیدیں، لیڑ ہیڈ، بڑی تعداد میں مختلف لوگوں کے نام پارٹی کے جاری شدہ کارڈ اور سیاسی شخصیات کے ساتھ بنی تصاویر برآمد کرلیں۔

ایف آئی اے حکام کا کہنا تھا کہ ملزم سیاسی شخصیات کے ساتھ بنی تصاویر استعمال کرکے اور مختلف سرکاری عہدے رکھنے کا بتا کر لوگوں کو سرکاری نوکریاں دلانے کا جھانسہ دے کر رقوم ہتھیانے میں بھی ملوث ہے۔

ملزم مصطفی انصاری نے نیشنل پیس کونسل کے نام سے سیاسی جماعت بنا کر 2015ء میں الیکشن کمیشن میں رجسٹرڈ کرائی تھی جسے 2017ء میں منسوخ کردیا گیا تاہم ملزم نے پارٹی دوبارہ بحال کرائی لیکن تین سال سے گوشوارے جمع نہ کرانے کے سبب الیکشن کمیشن نے اسے شوکاز نوٹس جاری کر رکھا ہے۔

ملزم زیادہ تر خیبرپختونخوا کے شہریوں کو اپنا نشانہ بناتا تھا، ملزم سے ابتدائی تفتیش میں انکشاف ہوا ہے کہ ملزم پارٹی ممبر شپ کے نام پر تین لاکھ افراد سے ممبر شپ کے نام پر بھاری رقم اکٹھی کرچکا ہے۔

ڈائریکڑ ایف آئی اے اسلام آباد زون وقار چوہان کا کہنا تھا کہ ملزم کو عدالت میں پیش کرکے چار دن کا ریمانڈ حاصل کرلیاگیا تفتیش میں مزید انکشافات کی توقع ہے۔