اسٹیٹ بینک نے زرعی قرضوں کا ہدف بڑھا کر 380 ارب کر دیا 50 فیصد تقسیم

5 بڑے بینک 99 ارب، زرعی بینک 31.5 ارب، پنجاب کوآپریٹو 4.7 ارب، اسلامی بینک 25 کروڑ، مائیکرو فنانسرز نے 13 ارب دیے۔ فوٹو: فائل

---

اسٹیٹ بینک نے زرعی شعبے کی فنانسنگ میں اضافے کے باعث رواں مالی سال زرعی قرضوں کیلیے 20 ارب روپے بڑھا کر 380 ارب روپے کا نیا ہدف مقرر کردیا جو 2012-13 میں تقسیم کردہ 336 ارب روپے کے قرضوں سے 13 فیصد زیادہ ہے۔

یہ فیصلہ قائم مقام گورنر اسٹیٹ بینک کی سربراہی میں ایگری کلچرل کریڈٹ ایڈوائزری کمیٹی کے اجلاس میں کیا گیا۔ سال 2013-14 کے 380 ارب روپے کے نظرثانی شدہ ہدف کے مقابلے میں بینکوں نے جولائی تا جنوری 2014 کے دوران 190 ارب روپے زرعی قرضے تقسیم کیے جو ہدف کا 50 فیصد ہے، یہ رقم گزشتہ سال کی اسی مدت کے دوران تقسیم کردہ 169.4 ارب روپے سے 12 فیصد زیادہ ہے، زرعی قرضوں کا واجب الادا پورٹ فولیو 40.1 ارب روپے (17.2 فیصد) بڑھ کر گزشتہ مالی سال کی اسی مدت کے مقابلے میں جنوری 2014 کے اختتام پر 232.7 ارب روپے سے بڑھ کر 272.8 ارب روپے ہوگیا۔

اعدادوشمار کے مطابق 5 بڑے بینکوں نے 98.7 ارب روپے یا اپنے سالانہ ہدف کے 52.5 فیصد زرعی قرضے تقسیم کیے جو گذشتہ برس کی اسی مدت میں تقسیم کیے گئے 89.6 ارب روپے سے 10 فیصد زائد ہیں، بڑے بینکوں میں ایم سی بی، حبیب بینک، نیشنل بینک، یونائیٹڈ بینک اور الائیڈ بینک نے اپنے ہدف کا بالترتیب 57.3 فیصد، 56.7 فیصد اور 55.4 فیصد، 43.8 فیصد اور 41.6 فیصد حاصل کیا۔

زرعی ترقیاتی بینک لمیٹڈ اپنے ہدف کا صرف 45.4 فیصد حاصل کر سکا اور اس نے اپنے 69.5 ارب روپے کے سالانہ ہدف کے مقابلے میں 31.5 ارب روپے تقسیم کیے جبکہ پنجاب پراونشل کوآپریٹو بینک لمیٹڈ اپنے 10 ارب روپے کے ہدف میں سے 47.2 فیصد حاصل کر سکا اور زیر جائزہ مدت کے دوران 4.7 ارب روپے تقسیم کیے، 14 ملکی نجی بینکوں نے مجموعی طور پر اپنے اہداف کا 46 فیصد حاصل کیا تاہم بینک الحبیب نے اپنے سالانہ ہدف کا 63.8 فیصد حاصل کیا، بینک آف پنجاب نے اپنے ہدف کا 52.7 فیصد، سندھ بینک نے 50.2 فیصد اور بینک آف خیبر اپنے سالانہ ہدف کا 50 فیصد حاصل کر سکا۔

مزید برآں فیصل بینک نے 45.1 فیصد، سونیری بینک نے 44.5 فیصد اور بینک الفلاح اپنے ہدف کا 42.8 فیصد حاصل کر سکے، 14 ملکی نجی بینکوں میں سے این آئی بی بینک اپنے سالانہ ہدف کا صرف 33.3 فیصد، سلک بینک 32.9 فیصد، عسکری بینک 21.6 فیصد، سمٹ بینک 19.1 فیصد اور کے اے ایس بی اپنے سالانہ ہدف کا 16.5 فیصد حاصل کر سکا، 7 مائیکرو فنانس بینکوں نے بطور گروپ اپنے زرعی قرضوں کے 21.6 ارب روپے کے سالانہ ہدف میں سے60.8 فیصد یا 13.1 ارب روپے تقسیم کیے، اسلامی طریقوں کے تحت اسلامی بینکوں نے زیر جائزہ مدت کے دوران زرعی قرض لینے والے افراد میں 0.532 ارب روپے کے سالانہ ہدف میں سے مجموعی طور پر 47.6 فیصد یا 0.252 ارب روپے تقسیم کیے۔