چین کی فربہ سوشل میڈیا ایکٹوسٹ وزن کم کرنے کے ’چیلنج‘ کے دوران ہلاک

نوجوان سوشل میڈیا ایکٹوسٹ لڑکی کا وزن 187 کلو تھا؛ فوٹو: فائل

---

چین میں 21 سالہ سوشل میڈیا ایکٹوسٹ 90 کلو وزن کم کرنے کے 'چیلنج کیمپ' میں ہدف کو پورا کرنے کی کوشش کے دوران چل بسیں۔

نیو یارک پوسٹ کے مطابق چین کی معروف سوشل میڈیا ایکٹوسٹ نے اپنے صوبے شانزے میں وزن کم کرنے کے ایک چیلنج کیمپ میں شمولیت اختیار کی تھی جس کے شرکا کو سخت ورزشوں اور کھانے پینے کی عادات میں غیر معمولی تبدیلیوں کی مدد سے 90 کلو (200 پاؤنڈ) وزن کم کرنا تھا۔

چین کی سوشل میڈیا انفلونسر 'کُئی ہوا' کا وزن 187 کلو تھا۔ انھوں نے کیمپ کی 100 سے زیادہ ویڈیوز اپ لوڈ کی تھیں۔ جس میں میں اپنے روزمرہ کے معمولات سے آگاہ کرتی تھیں۔ جس میں ہائی انٹینسٹی کارڈیو، اور پٹھوں کو مضبوط کرنے کی تھکا دینے والی ورزشیں جیسے جنگی رسیاں، اور ویٹ لفٹنگ وغیرہ شامل ہیں۔

کیمپ میں ابھی انھیں چند ماہ ہی ہوئے تھے کہ ایک دن اچانک ان کی طبیعت بگڑ گئی۔ انھیں اسپتال لے جایا گیا لیکن وہ جانبر نہ ہوسکیں۔ فی الحال موت کی وجہ کا تاحال تعین نہیں ہوسکا لیکن ان کے اہل خانہ کا کہنا تھا کہ کیمپ میں وہ بہت تھکن اور نقاہت کا شکار تھیں۔

شنگھائی مارننگ نیوز کی رپورٹ کے مطابق سوشل میڈیا انفلونسر کیمپ میں سخت ورزشیں کر رہی تھیں۔ وہ بہت کم کھانا کھاتیں اور صرف سبزیوں یا پروٹین ڈائیٹ پر گزارا کر رہی تھیں۔ وہ دن بھر میں صبح اور شام دو دو گھنٹے سخٹ ورزش بھی کر رہی تھیں۔

سوشل میڈیا ایکٹوسٹ کے والدین نے بیٹی کے اکاؤنٹ پر انتقال کی خبر شیئر کرتے ہوئے لکھا کہ آپ سب کی حمایت اور محبت کے لیے شکریہ۔ ہماری بچی دنیا سے بہتر مقام پر چلی گئی۔ ہم امید کرتے ہیں کہ لوگ چند افراد کی بدنیتی پر مبنی باتوں میں آکر گمراہ نہیں ہوں گے، جس سے والدین اور خاندان کو تکلیف پہنچ سکتی ہے۔

ورزش کے شوقین افراد نے دعویٰ کیا کہ ''کُئی ہوا'' نے صرف 6 ماہ میں 80 پاؤنڈ وزن کم کیا تھا۔ ان کی موت سے چینی سوشل میڈیا پر ایک بحث چھیڑ گئی ہے۔ جس میں بہت سے لوگوں نے وزن کم کرنے کے چیلنج کیمپس کو دباؤ سے بھرپور اور لوگوں کی موت کی وجہ قرار دیا۔

واضح رہے کہ چین میں غذائیت اور دائمی بیماریوں کی حیثیت سے متعلق 2020 کی رپورٹ کے مطابق ملک کے نصف سے زیادہ بالغ افراد زیادہ وزن رکھتے ہیں اور موٹاپے کا شکار ہیں۔