وزیراعظم نواز شریف 3 روزہ سرکاری دورے پرسری لنکا پہنچ گئے

وزیراعظم کے دورہ کے دوران دونوں ملکوں کے درمیان مختلف شعبہ جات میں مفاہمت کی یادداشتوں اور معاہدوں پر دستخط ہوں گے ۔ فوٹو:فائل

---

وزیراعظم نواز شریف تین روزہ سرکاری دورے پر سری لنکا پہنچ گئے ہیں جہاں سری لنکن وزیراعظم نے ایئرپورٹ پر ان کا استقبال کیا۔


ایکسپریس نیوز کے مطابق وزیراعظم نوازشریف سری لنکن صدر میتھری پالا سری سینا کی دعوت پر 3 روزہ سرکاری دورے پر سری لنکا پہنچ گئے ہیں جہاں ایئرپورٹ پر سری لنکن وزیراعظم رنیل شریان وکرما سنگھے نے اپنی کابینہ کے ہمراہ ان کا استقبال کیا۔

وزیراعظم نوازشریف 3 روزہ دورے کے دوران سری لنکن صدر، وزیراعظم اور دیگر اعلیٰ حکام سے ملاقاتیں کریں گے جس میں مختلف شعبوں خصوصاً تجارت اور معیشت میں دوطرفہ تعلقات بڑھانے کے طریقوں پر تبادلہ خیال کریں گے جب کہ سری لنکا کے صدر سرکاری طور پر وزیراعظم کے اعزاز میں عشائیہ بھی دیں گے۔

دفتر خارجہ کے مطابق وزیراعظم کے دورہ سری لنکا کے دوران دونوں ممالک میں مختلف شعبہ جات میں مفاہمت کی یادداشتوں اور معاہدوں پر دستخط ہوں گے جب کہ وزیراعظم کولمبو میں وزرا، ارکان پارلیمنٹ، سینیئرحکام، تاجروں اورسفارت کاروں کے ایک اجلاس سے بھی خطاب کریں گے۔