قاتل شراب دیسی آفٹرشیو میں کیمیکل ملا کر بنائی گئی تھی ڈی پی اوٹوبہ ٹیک سنگھ کا انکشاف

زہریلی شراب بنانے والوں میں اقبال، کامران اور عدیل نامی 3 ملزمان شامل تھے، ڈی پی او ٹوبہ ٹیک سنگھ : فوٹو : اے ایف پی

---

ڈی پی او عثمان اکرم گوندل کا کہنا ہے کہ زہریلی شراب میں آفٹرشیو کا استعمال کیا گیا تھا۔

ٹوبہ ٹیک سنگھ میں میڈیا سے بات کرتے ہوئے ڈی پی او عثمان اکرم گوندل کا کہنا تھا کہ ابتدائی تحقیقات میں انکشاف ہوا ہے کہ 49 افراد کی موت کا باعث بننے والی زہریلی شراب بنانے والوں میں اقبال، کامران اور عدیل نامی 3 ملزمان شامل تھے جنہوں نے 20 لیٹر آفٹر شیو لوشن شورکوٹ سے خریدا اور اس میں کیمیکل ملا کر زہریلی شراب بنائی گئی، ان کا کہنا تھا کہ آفٹر شیو لوشن میں اسپرٹ موجود تھا جو نشہ آور ہوتا ہے۔

اس خبرکوبھی پڑھیں: زہریلی شراب پینے سے ہلاکتوں کی تعداد 41 ہوگئی

ڈی پی او نے بتایا کہ زہریلی شراب بنانے والے ملزمان میں کامران ، عدیل اور اقبال شامل ہیں جن میں سے اقبال مر چکا ہے جبکہ عدیل اور کامران اسپتال میں زیرعلاج ہیں۔

اس خبرکوبھی پڑھیں: شہبازشریف کا زہریلی شراب سے ہلاکتوں کا نوٹس

دوسری جانب ایم ایس ڈی ایچ کیو ڈاکٹر آصف کا کہنا ہے کہ زہریلی شراب سے متاثرہ 119 مریض اسپتال لائے گئے تھے لیکن جب مریض اسپتال پہنچے تو ان کے خون میں شراب شامل ہوچکی تھی اور زہریلی شراب نے تمام مریضوں کی آنکھوں، دماغ، گردوں اور سانس کو متاثر کر رکھا تھا۔جن کے معدوں کی صفائی اور علاج کیا جا رہا ہے۔