مہیش بھٹ کی بیٹی عالیہ ’’ہائی وے‘‘ میں رندیپ ہودا کی ہیروئن بنیں گی

15برس سے اس کہانی پر کام کررہا تھا ،امتیاز علی ،کردار سمجھ آجائے تو فلم سائن کرتی ہوں، 20سالہ بالی وڈ اداکارہ کی گفتگو۔ فوٹو: فائل

---

بالی وڈ اداکارہ عالیہ بھٹ کی نئی فلم ''ہائی وے ''مکمل ہوگئی ہے ،یہ فلم اب ریلیز کے لیے تیار ہے اسے رواں سال ہی سینماگھروں کی زینت بنایا جائے گا۔

بالی وڈ اداکارہ عالیہ امیتاز علی کی اس فلم میں رندیپ ہودا کی ہیروئن بنیں گی ۔یہ فلم 13دسمبر کو سینماگھروں کی زینت بنائی جائے گی ۔فلم کے ہدیتکار امیتاز علی نے ہی اس کی کہانی لکھی ہے جب کہ فلم کو ساجد نڈیا والا نے پروڈیوس کیا ہے ۔امیتاز علی نے بتایا کہ اداکارہ عالیہ ہی اس فلم کے لیے بہترین اور موزوں ترین انتخاب ہے ۔اس فلم کی کہانی گزشتہ 15سال سے میرے ذہن میں رہی جس میں یقینی طور پر کوئی ایسی چیز ضرور ہے جس نے اس خیال کو زندہ رکھا۔ انھوں نے کہا کہ اس وقت عالیہ بہت چھوٹی تھی اور اس کے بارے میں کچھ بھی نہیں سوچا تھا جونہی کہانی لکھی اور پھر دیکھا تو عالیہ ہی اس کے لیے فٹ نظر آئیں جن کو کاسٹ کرلیا گیا ۔

اداکارہ رواں سال ریلیز ہونے والی دو نئی فلموں میں جلوہ گرہونگی ۔اداکارہ عالیہ بھٹ نے فلم ''اسٹوڈنٹس آف دی ایئر''سے فنی سفر کا خوبصورت آغازکرکے شائقین کی توجہ حاصل کی۔ ان کی نئی آنیوالی فلم ''2سیٹسیس'' 2014میں ریلیز کی جائے گی ۔یہ فلم بھی تکمیل کے مراحل میں داخل ہوچکی ہیں ۔20سالہ بالی وڈ اداکارہ کا کہنا ہے کہ ہندی فلموں کے ساتھ ساؤتھ کے لیے بھی کام کررہی ہوں۔ انھوں نے کہا کہ نئی فلموں میں مختلف کردار نبھاؤں گی ۔فلم میں شادی شدہ عورت کا کردار بھی نبھانے کے لیے مشاہدات کرتی رہی ہوں اور اس تجربے سے بھی کامیابی کے ساتھ گزری ہوں۔انھوں نے کہا کہ آنیوالی فلموں میں اپنے کردار کو پرفکیٹ بنانے کی کوشش کی ہے ۔

اداکارہ نے بتایا کہ نئی فلموں میں ہر طرح کا کردار نبھانے جارہی ہوں اور ان کرداروں کے لیے محنت اور مطالعہ کو ضروری سمجھتی ہوں ۔اس لیے میں نے اپنے کام پر زیادہ توجہ مرکوز کررکھی ہے ۔فلم کے کردار کے لیے اپنا لب ولہجہ بھی ویسا ہی بنانے کے لیے حقیقی کرداروں کا مشاہدہ کیا ہے ۔پہلے کرداروں پر غور کیا ان کو سمجھا ہے اور پھر ان کی طرح ان کے ماحول میں رہ کر خود کو ان کرداروں میں ڈھالنے کی سعی بھی کی ہے۔ جب میں سمجھتی ہوں کہ فلمی کردارکرنے کے قابل ہوگئی ہوں تو پھر اس کے لیے حامی بھرتی ہوں ۔انھوں نے کہا کہ نئی فلموں میں نئے کردار نبھانے کے لیے تیاری اسی طرح کرتی ہوں ۔اداکارہ کا کہنا ہے کہ نئی فلموں میں کام کرنے کی پیشکش ہوتی ہے تو مجھے خوشی ہوتی ہے ،نئی فلموں کے اسکرپٹ کو دیکھتی ہوں اور پھر ان میں اپنے کردار کا جائزہ لے کرکام کرنے کافیصلہ کرلیتی ہوں ۔



انھوں نے کہا کہ دوسروں کے تجربات سے سیکھنے کی کوشش کرتی رہتی ہوں ۔ایک اور فلم ''2سٹیسٹس ''بھی کرلی ہے اس میںایک تامل لڑکی کی شادی اور محبت کی کہانی ہے جسکی ایک پنجابی لڑکے سے شادی ہوجاتی ہے۔ یہ فلم عشق اور شادی کے تجربات پر مبنی ہے ۔اس میں دونوں کے خاندان میں ثقافتی اقدار کے تضاد حائل ہوتے ہیں۔ اداکارہ نئی فلم میں ارجن کپور کے مدمقابل جلوہ گرہورہی ہیں ۔ اداکارہ کو ایکتا کپور کے نئے پراجیکٹ میں بھی کاسٹ کیا گیا ہے۔ مہیش بھٹ کی صاحبزادی کو ہدایت کار کرن جوہر نے لانچ کرکے بالی وڈ میں ان کے لیے نئے راستے بنائے ہیں ۔اس وقت اداکارہ عالیہ بھٹ کو کئی نئی فلموں کی پیشکش ہوئی ہے ان میں دو فلموں کو سیٹ کی زینت بنایا گیا ہے ۔واضح رہے کہ اداکارہعالیہ بھٹ فنکار فلمساز، ہدایتکار اور رائٹر مہیش اور اداکارہ سونی کے گھر 15مارچ 1993کو ممبئی میں پیدا ہوئیں ۔

اداکارہ ہدایتکارو اداکارہ پوجابھٹ ، شاہین بھٹ اور راہول کی بہن ہیں اداکار عمران ہاشمی ان کے کزن ہیں جب کہ مکیش بھٹ انکل ہیں۔ عالیہ نے اگرچہ 1999کی فلم ''سنگھرش'' میں چائلڈ اسٹار کے طور پر کام کیا۔ تاہم ان کی بطور اداکارہ پہلی فلم 2012کو ریلیز ہونے والی ''اسٹوڈنٹ آف دی ایئر ''ہی قراردی جارہی ہے۔اداکارہ کو پہلی بار کرن جوہر نے فلم میں لیڈنگ لیڈی رول میں متعارف کرایا۔ اس فلم نے باکس آفس پر کامیابی حاصل کرکے نئے ریکارڈ بنائے۔ بالی وڈ نقاد وں کاکہنا ہے کہ عالیہ عمدہ پرفارمنس نے ان کے مستقبل کے لیے راہیں آسان کردی ہیں ،انھوں نے اداکارہ کی پہلی فلم کو اچھا آغاز قرار دیتے ہوئے کہا ہے کہ عالیہ کا آغاز کرینہ کپور کی فلم ''کبھی خوشی کبھی غم'' کی طرح ہے۔ انھوں نے کہا کہ فنکار گھرانے سے تعلق ہونے پران سے جو توقعات وابستہ کی جارہی تھیں عالیہ ان پر ہو بہو پوری اترتے ہوئے نظر آتی ہیں، تاہم ان کی نئی فلمموں میں اب پرفارمنس کی دھاک بٹھانے کی لیے تیاری کو بھی دیکھا جارہا ہے ۔بالی وڈ حلقوں کا کہنا ہے کہ عالیہ کی پرفارمنس شاندار رہی ۔آنیوالی فلموں میں مزید بہتری کی توقع کی جاسکتی ہے ۔