حکومت سندھ نے ڈوئنگ بزنس ریفارمز امپلی مینٹیشن یونٹ قائم کردیا

اطلاق کو ممکن بنانے کے لیے تجاویز اور سفارشات بھی سندھ حکومت کو منظوری اور عملدرآمد کے لیے پیش۔فوٹو: فائل

---

KARACHI: سندھ حکومت نے کاروباری آسانیوں کے پروگرام میں مزید بہتری لانے کے لیے محکمہ سرمایہ کاری کے ماتحت سندھ ڈوئنگ بزنس ریفارمز امپلی مینٹیشن یونٹ ( SDBRIU) قائم کردیا ہے۔

عالمی بینک کے ڈوئنگ بزنس ریفارم انڈیکس میں پاکستان کی رینکنگ میں واضح بہتری آنے کے بعد سندھ حکومت نے کاروباری آسانیوں کے پروگرام میں مزید بہتری لانے کے لیے محکمہ سرمایہ کاری کے ماتحت سندھ ڈوئنگ بزنس ریفارمز امپلی مینٹیشن یونٹ ( SDBRIU) قائم کردیا ہے۔

یہ یونٹ تمام متعلقہ سرکاری اداروں، نجی شعبے اور دیگر کاروباری اسٹیک ہولڈرز کے ساتھ روابط اور مشاورت کے ذریعے کاروباری آسانیوں کے پروگرام کو مزید بہتر بنانے کے لیے ان سب کی شمولیت اور اونر شپ کے احساس کے ساتھ دور رس اقدامات عمل میں لائے گا اور سندھ حکومت کے کاروباری آسانیوں کے اصلاحاتی ایجنڈے کو تیزی سے آگے بڑھائے گا۔

یہ یونٹ صوبے میں کاروبار شروع کرنے کے لیے درکار اجازت ناموں کی راہ میں حائل رکاوٹوں اور خامیوں کو دور کرنے اور اس ضمن میں بین الاقوامی طور پر رائج طریقوں ( Practices) کے اطلاق کو ممکن بنانے کے لیے تجاویز اور سفارشات بھی سندھ حکومت کو منظوری اور عملدرآمد کے لیے پیش کرے گا۔

واضح رہے کے سندھ حکومت کا محکمہ سرمایہ کاری، عالمی بینک کی معاونت کے ساتھ صوبے میں کاروباری آسانیوں کے لیے ایک مؤثر پروگرام پر سرگرمی سے عمل پیرا ہے جس کے تحت کاروبار شروع کرنے کے لیے درکار اجازت ناموں،لائسنسز اور پرمٹس وغیرہ کے حصول کے مراحل کو مختصر کرنے اور کم سے کم وقت میں کاروباری اجازت ناموں کے حصول و اجرا کے لیے موثر اصلاحات پر عمل کیا جارہا ہے۔