رافیل طیاروں سے فرق نہیں پڑتا اصل شے جذبہ اورٹریننگ ہے مقررین

ہمارے سیکیورٹی ادارے مسلسل کام کر رہے ہیں، سندھ پولیس نے بھرپور جنگ لڑی، اسٹاک ایکسچینج حملہ ناکام بنایا ۔ فوٹو :ایکسپریس

---

دفاعی تجزیہ کاروں اور سیکیورٹی ماہرین نے کہاہے کہ پاک بھارت جنگ میں رافیل طیاروں سے فرق نہیں پڑتا، اصل شے ہمارا جذبہ اور تربیت ہے آزادی کی قیمت ہوتی ہے، امن کے پیچھے قربانیاں ہیں،اگر جنگوں میں قربانی پیش کرنے والے نہ ہوتے توہم آج آزاد نہ ہوتے، ان خیالات کا اظہار انھوں نے وائس آف سندھ کے زیر اہتمام ڈیفنس اینڈڈپلومیسی کے موضوع پر سیمینار سے خطاب میں کیا۔

پی اے ایف کیٹ کے چانسلر ایئر مارشل مرزا ظفر حسین نے کہا کہ 65 کی جنگ کے پیچھے ہماری تربیت اورجذبہ تھا، اس تربیت کا سلسلہ اب بھی جاری ہے، ملک نے ہمیںسہولتیں فراہم کیں، بھارتی رافیل سے فرق نہیں پڑتا، اصل شے ہمارا جذبہ اورتربیت ہے ، ڈی آئی جی سیکیورٹی، مقصود میمن کا کہنا تھاکہ آزادی کی قیمت ہوتی ہے۔

آج جو امن ہے اس کے پیچھے کئی خاندانوںکی قربانی ہے، سیکیورٹی ادارے مسلسل کام کررہے ہیں، سندھ پولیس نے بھرپور جنگ لڑی، اسٹاک ایکسچینج حملہ ناکام بنایا ، سابق سفارت کار کیپٹن (ر) جمیل احمد خان نے کہاکہ ففتھ جنریشن وار اور ہائبرڈ وار کا مقصد منفی سوچ پیدا کرنا ہے میں جنگوں میں قربانی پیش کرنے والوں کو سلام کرتا ہوں اگر وہ نہ ہوتے تو ہم آج آزاد نہ ہوتے ، وائس ایڈمرل رٹائرڈ عارف اللہ حسینی نے کہاکہ اللہ نے ہمارے ڈی این اے کوجنگ جیتنے کے لیے پروگرام کیا ہے ہم نے عالمی طاقتوں کو شکست دی اگر ہم آئین اور قومی ترانہ سمجھ لیں تو ترقی کا راستہ خود ہی نکل آئے گا۔

وائس آف سندھ کے پیٹرن ان چیف حنید لاکھانی نے خطاب میں کہاکہ دشمن کی تعداد نہیں جذبہ ایمانی اصل شے ہے آج کے دورمیں ٹیکنالوجی کی خصوصی اہمیت ہے جنگوں میں اس کا کردار خصوصی اہمیت اختیار کر گیا ہے، تقریب کے آخر میں بزنس مین اور سماجی کارکن عقیل کریم ڈھیڈی، حنید لاکھانی اور پروجیکٹ ڈائریکٹر عمیر ہارون نے مندوبین میں خصوصی شیلڈز تقسیم کیں، سیمینارکے دوران ڈاکٹر عمیر ہارون کی خصوص پیش کش ڈارک روم تھیٹر بھی پیش کیاگیا جس میں ساجد حسن ،راشد فاروقی اورعمر خیام نے مرکزی کردارنبھائے، تقریب کی نظامت ناجیہ میر نے کی۔