67 کروڑ روپے کی کرپشن میں ملوث 3 ملزمان کو جیل بھیج دیا گیا

ریفرنس میں سابق کمشنر سیسی فاروق لغاری،سابق ایم ایس لانڈھی اسپتال ظہیر عباس،قادر منگی،سعادت میمن،جاوید راجپوت بھی شامل (فوٹو : فائل)

---

احتساب عدالت نے کے وی ایس ایس اسپتال کو ادویات کی خریداری کی مد میں 67 کروڑ سے زائد کا نقصان پہنچانے سے متعلق سابق آڈیٹر ڈاکٹر قاضی عبد الوہاب سمیت 14 ملزمان کے خلاف ریفرنس میں 3 ملزمان کو جیل بھیج دیا۔

کراچی احتساب عدالت کے روبرو ملزمان کے خلاف ریفرنس کی سماعت ہوئی۔ نیب نے ریفرنس میں مفرور تین ملزمان محمد آصف، آفاق احمد اور شاہد قمر کو عدالت میں پیش کردیا۔ عدالت نے ملزمان کو عدالتی ریمانڈ پر جیل بھیج دیا۔

گرفتار تین ملزمان کے سوا دیگر ملزمان ضمانت پر رہا ہیں۔ ریفرنس کے دیگر ملزمان میں سابق کمشنر سیسی محمد فاروق لغاری، سابق ایم ایس لانڈھی اسپتال ڈاکٹر ظہیر عباس خواجہ، سابق ایم ایس انیس قادر منگی، ایم ایس سعادت احمد میمن، سابق ایم ایس جاوید احمد راجپوت اور دیگر شامل ہیں۔

نیب کے مطابق ادویات کی خریداری میں جعل سازی کی گئی۔ ادویات کی خریداری میں سیپرا رولز کی خلاف ورزی کی گئی۔ سابق کمشنر سیسی فاروق لغاری نے اختیارات کا ناجائز استعمال کیا۔ ملزمان نے ملی بھگت سے قومی خزانے کو 67 کروڑ 99 لاکھ 13 ہزار 148 روپے کا نقصان پہنچایا۔