وفاقی وزیر خزانہ نے ٹیکس وصولیوں کا ہدف غیر حقیقی قرار دیدیا

معیشت درست سمت کی طرف جا رہی ہے، بمشکل 23 کھرب کی وصولی ہوپائے گی، اسحاق ڈار۔ فوٹو: فائل

---

لاہور: وزیر خزانہ اسحاق ڈارنے رواں مالی سال ٹیکس وصولی کے ہدف کو غیرحقیقی قرار دیتے ہوئے کہاہے کہ 30 جون تک بامشکل 23 کھرب روپے وصولی ہوپائے گی۔

نجی ٹی وی کے مطابق وزیر خزانہ نے کہاکہ رواں مالی سال ٹیکس وصولی کیلیے 24 کھرب 75ارب روپے کا ہدف غیرحقیقی ہے۔ آئی ایم ایف نے بھی ٹیکس وصولی کے ہدف پر نظرثانی کرتے ہوئے اسے کم کر کے 23 کھرب 45 ارب روپے کر دیا۔ وزیر خزانہ نے خدشہ ظاہر کیا کہ رواں مالی سال ٹیکس وصولی مقررہ ہدف سے ایک سو پچاس ارب روپے کم رہے گی جبکہ ٹیکس وصولی میں کمی سے دیگر ترقیاتی منصوبے متاثر ہوں گے اور ترقیاتی بجٹ میں کٹوتی کرنا پڑیگی۔ وزیرخزانہ اسحاق ڈارنے کہا کہ قومی معیشت درست سمت کی طرف جا رہی ہے، آئی ایم ایف نے اقتصادی شرح نمومیں بہتری کی پیش گوئی کی ہے،مارچ میں زرمبادلہ کے ذخائردس ارب ڈالرتک پہنچ جائینگے۔ انہوں نے کہا کہ حکومت میں آنے کے بعد آئی ایم ایف سے قرض کم لیا، واپس زیادہ کیا ہے۔