جامعہ کراچی کا پی ایچ ڈی پروگرام میں سال میں دوبار داخلے دینے کا فیصلہ

جامعہ کراچی کے بورڈ برائے ایڈوانس ریسرچ نے پی ایچ ڈی پروگرام میں سال میں دو مرتبہ داخلے دینے کا حتمی فیصلہ کرلیا۔

ایکسپریس نیوز کے مطابق جامعہ کراچی کی جانب سے سن 2019 میں بھی سال میں دو مرتبہ پی ایچ ڈی پروگرام میں داخلے دئیے گئے تھے تاہم بعد میں اس سلسلے میں تعطل آگیا تھا۔

نمائندہ ایکسپریس نیوز کا کہنا ہے کہ یہ فیصلہ بدھ کو بورڈ برائے ایڈوانس اسٹڈیز اینڈ ریسرچ کے منعقدہ اجلاس میں کیا گیا، اس کی صدارت وائس چانسلر پروفیسر ڈاکٹر خالد عراقی نے کی۔

علاوہ ازیں اس فیصلے کے حوالے سے اجلاس کے بعد وائس چانسلر نے “ایکسپریس” کو بتایا کہ سال کے مختلف اوقات میں طلباء و طالبات اپنا ایم فل مکمل کرکے کئی کئی ماہ تک پی ایچ ڈی میں داخلوں کا انتظار کرتے تھے اور داخلوں کا اعلان سالانہ بنیادوں پر ایم فل اور ایم ایس کے ساتھ مئی میں کیا جاتا تھا تاہم جو طلبہ پی ایچ ڈی کی ریسرچ کرنا چاہتے ہیں ان کے کئی ماہ ضائع ہوجاتے تھے لہذا اب یہ فیصلہ کیا گیا ہے کہ سال میں پی ایچ ڈی کے دو سیشن ہونں گے۔

انہوں نے کہا کہ ایک بار علیحدہ سے داخلے دسمبر/ جنوری میں دیے جائیں گے جب کہ دوسری بار ایم فل/ایم ایس کے ساتھ روایتی طور پر داخلے دیے جائیں گے۔

وائس چانسلر کا کہنا تھا کہ ضروری ابتدائی کارروائی کے بعد جنوری میں داخلوں کا اعلان کیا جائے گا۔

واضح رہے کہ پی ایچ ڈی پروگرام میں سال میں دو بار داخلوں کی تجویز جامعہ کراچی کے ایچ ای جے ریسرچ انسٹیٹیوٹ کی جانب سے بورڈ برائے ایڈوانس اسٹڈیز اینڈ ریسرچ کو دی گئی تھی جسے تمام شعبوں کے لیے منظور کیا گیا ہے۔