پاکستان دفاعی آلات کی برآمد سے کثیر زرمبادلہ کما سکتا ہے رانا تنویر

ڈالر کی قدر میں کمی اور اربوں ڈالر کی سرمایہ کاری بہترین معاشی منصوبہ بندی کا نتیجہ ہے، وفاقی وزیر دفاعی پیداوار فوٹو: فائل

---

دفاعی پیداوار کے وفاقی وزیر رانا تنویر حسین نے کہا کہ آنے والا وقت پاکستان کا ہے۔ پاکستان نہ صرف ایشیا بلکہ دنیا میں تیزی سے ترقی کرنے والی معیشتوں میں شامل ہو جائے گا۔

اندرونی اور بیرونی سرمایہ کاری کے لیے ماحول کو ساز گار بنایا جا رہا ہے۔ ملک کی اقتصادی صورتِحال روز بروز بہتر ہو رہی ہے۔ ڈالر کی قدر میں کمی اور اربوں ڈالر کی سرمایہ کاری بہترین معاشی منصوبہ بندی کا نتیجہ ہے۔ پاکستان دفاعی آلات کو دنیا میں متعارف کرواکر کثیر زرِ مبادلہ کماسکتا ہے۔ وہ اتوار کے روز ملائشیا روانگی سے قبل شیخوپورہ میں ذرائع ابلاغ کے نمائندوں سے گفتگو کر رہے تھے۔ وفاقی وزیر اپنے وفد کے ہمراہ ملائشیا میں ہونے والی دفاعی آلات کی نمائش میں شرکت کیلیے ملائشیاروانہ ہونگے۔ اپنے دورے کے حوالے سے گفتگو کرتے ہوے رانا تنویر حسین نے کہا کہ پاکستان کے ملائشیا کے ساتھ گہرے مضبوط اور برادرانہ تعلقات ہیں، ہم ملائشیا کی ترقی اور تجربات سے فائدہ اُٹھائیں گے۔ وفاقی وزیر کا کہنا تھا کہ دونوں ممالک کے ساتھ وفود کے تبادلوں سے ملائشیا کے ساتھ تعلقات مزید مضبوط ہونگے۔

انہوں نے کہا کہ پاکستان اور ملائشیا بے شمار منصوبوں پر مشترکہ کام کر رہے ہیں اِن منصوبوں کی تکمیل سے ملک میں ترقی اور خوشحالی کی نئی راہیں کھلیں گی۔ اُنہوں نے کہا کہ برادر اسلامی ممالک کے ساتھ تعلقات مزید مضبوط کرنے کیلیے منصوبہ بندی کے تحت کام کر رہے ہیں۔ پاکستان جدید ترین دفاعی آلات تیار کر رہا ہے جنہیں برآمد کر کے نہ صرف ہم زرِ مبادلہ کما سکتے ہیں بلکہ اپنی معیشت کو بھی مضبوط کر سکتے ہیں۔ نمائش کے موقع پر دنیا کے مختلف ممالک کے وفود کے ساتھ دفاعی آلات کی برآمد کے سلسلے میں بات چیت کرینگے۔ انہوں نے کہا کہ پاکستان سرمایہ کاری کیلیے ابھرتی ہوئی مارکیٹ ہے یہاں انفرااسٹرکچر اور توانائی کے شعبوں میں سرمایہ کاری کے وسیع مواقع موجود ہیں۔ سرمایہ کاروں کو اِن مواقع سے فائدہ اُٹھانا چاہیے۔