چیرمین سینیٹ کے بیٹے کی شادی پر گلوکار سے گن پوائنٹ پر گانا سُنا گیا

چیئرمین سینیٹ کے بھائی اوراس کے ساتھی گلوکارندیم عباس لونے والا کو گن پوائنٹ پرگھنٹوں زبردستی گانے پرمجبور کرتے رہے۔ فوٹو؛ فائل

---

چیرمین سینیٹ نیرحسین بخاری کے صاحبزادے کے شادی میں ملک کے معروف گلوکاراللہ دتہ لونے والا کے بیٹے اور''لکھ واری بسم اللہ کراں'' گاکرشہرت حاصل کرنے والے نوجوان گلوکارندیم عباس لونے والاکو چیئرمین سینیٹ کے بھائی اوراس کے ساتھی گن پوائنٹ پرگھنٹوں زبردستی گانے پرمجبور کرتے رہے۔

فجرکی اذان پر جب ندیم عباس نے گانا بند کیا تو سبطی شاہ نے کہاکہ گاؤ ورنہ تمھیں گولی مار دوں گا۔ ندیم عباس نے دھمکی کے باوجود گانے سے انکارکردیا۔ رپورٹ کے مطابق چیئرمین سینیٹ کے بھائی سبطی شاہ نے طے شدہ معاوضے کی ادائیگی کے بجائے فنکار سے انتہائی توہین آمیز سلوک کیا۔

ندیم عباس کے ساتھ 2 گھنٹے پرفارم کرنے کا معاوضہ طے کیاگیا تاہم اس نے اپنی خوشی سے 3گھنٹے تک محفل میں گایا اور جب اس نے گانے کا اختتام کیا تو سبطی شاہ نے گلوکار پر بندوق تان لی اور تا حکم ثانی گائیکی جاری رکھنے کاحکم دیا۔ اس موقع پرچیئرمین سینیٹ بھی موجود تھے۔ جب نوجوان گلوکارنے ان سے ان کے بھائی کے رویے کی شکایت کی تونوٹس لینے کے بجائے چیئرمین سینیٹ نے منہ پھیرلیا۔ ندیم عباس صبح ہونے تک گاتا رہا۔