دریائے سوات کے سیلابی ریلے میں بہہ جانے والے ایک لاپتا بچے کی تلاش کے لیے ڈسٹرکٹ ایمرجنسی آفیسر رفیع اللّٰہ مروت کی نگرانی میں واٹر ریسکیو اینڈ سرچ آپریشن چوتھے روز بھی جاری ہے۔
ڈسٹرکٹ ایمرجنسی آفیسر ریسکیو1122 سوات رفیع اللّٰہ مروت نے کہا کہ ریسکیو1122 اس وقت دریائے سوات کے مختلف مقامات پر ریسکیو ٹیمیں سرچ آپریشن کررہی ہیں۔
اس کے علاوہ دریائے سوات کے کنارے تجاوزات کے خلاف آپریشن دوسرے روز بھی جاری ہے، آپریشن صبح شروع کیا گیا، آپریشن میں بڑی تعداد میں تجاوزات کو مسمار کیا گیا۔
اے ڈی سی حامد خان نے کہا کہ آپریشن تجاوزات کے مکمل خاتمے تک جاری رہےگا، آپریشن میں سوات انتظامیہ، ٹی ایم اے، ایریگیشن، پولیس اور لیویز اہلکار حصہ لے رہے ہیں، بائی پاس پر آپریشن مکمل ہونے کے بعد فضاء گھٹ سائیڈ پر شروع ہوگا۔
آپریشن سانحہ سوات میں لاپتا سیالکوٹ کے عبداللہ کی تلاش جاری ہے، ریسکیو ٹیمیں اور مقامی غوطہ خور 5 مقامات پر سرچ آپریشن کر رہے ہیں، دریائے سوات سے اب تک 12لاشوں کو نکالا جا چکا ہے۔
کے پی حکومت کے ترجمان بیرسٹر سیف نے کہا کہ سوات کا واقعہ انتہائی المناک ہے، ہمیں افسوس ہے ، یہ قدرتی آفت تھی جس میں ہمارے پنجاب سے آئے مہمان زد میں آئے، سیلاب اور کلاؤڈ برسٹ قدرتی ہوتا ہے، ہم اس میں صرف لوگوں کو بچا سکتے ہیں۔
ان کا کہنا تھاکہ زمہ دار افراد کو اسی وقت سزا دی گئی، جن کے ناجائز تجاوزات ہوتے وہ کاروائی کرنے پر عدالتی حکم امتناعی لے لیتے ہیں۔
