ترسیلات زر16ارب63کروڑ ڈالر کی بلند ترین سطح پر پہنچ گئیں

بیرون ملک مقیم پاکستانیوں نے جولائی تا مئی کے دوران ریکارڈ 16ارب 63کروڑ 27 لاکھ60 ہزار ڈالر وطن بھجوائے۔ فوٹو: فائل

---

بیرون ملک مقیم پاکستانیوں نے رواں مالی سال کے پہلے 11 ماہ (جولائی تا مئی) کے دوران ریکارڈ 16ارب 63کروڑ 27 لاکھ60 ہزار ڈالر وطن بھجوائے جو گزشتہ مالی سال کی اسی مدت میں بھجوائی گئی 14ارب 33کروڑ 83لاکھ 80 ہزار ڈالر کی رقم سے 2ارب29کروڑ43لاکھ80ہزار ڈالر یا 16 فیصد زیادہ ہے۔

اسٹیٹ بینک آف پاکستان سے جاری اعدادوشمار کے مطابق مئی 2015 کے دوران کارکنوں کی ترسیلات1ارب 66کروڑ 31 لاکھ ڈالر رہیں جو اپریل 2015 کے مقابلے میں 1.37فیصد اورمئی 2014ء کے مقابلے میں 15.46 فیصد زائد ہیں۔

اعداد و شمار کے مطابق گزشتہ ماہ سعودی عرب سے 52کروڑ 83 لاکھ 40 ہزار ڈالر،، متحدہ عرب امارات 39کروڑ 93 لاکھ 50 ہزار ڈالر،امریکا 22کروڑ 11 لاکھ ڈالر، برطانیہ 19کروڑ 41لاکھ 50 ہزار ڈالر، خلیج تعاون کونسل کے ملکوں (بشمول بحرین، کویت، قطر اور عمان) سے 19کروڑ 6لاکھ 60 ہزار ڈالر، یورپی یونین کے ملکوں سے 2 کروڑ 85 لاکھ ڈالر اور ناروے، سوئٹزر لینڈ، آسٹریلیا، کینیڈا، جاپان اور دیگر ملکوں سے 10کروڑ 10 لاکھ ڈالر موصول ہوئے تھے۔

اعدادوشمار کے مطابق مئی 2014 میں سعودی عرب سے 45کروڑ 11لاکھ 40 ہزار ڈالر، متحدہ عرب امارات 29کروڑ 9لاکھ 10 ہزار ڈالر، امریکا 21کروڑ 68 لاکھ 40 ہزار ڈالر، برطانیہ 18کروڑ 10لاکھ 40 ہزار ڈالر، خلیج تعاون کونسل کے ملکوں (بشمول بحرین، کویت، قطر اور عمان) سے 16 کروڑ 40 لاکھ 10ہزارڈالر،یورپی یونین کے ملکوں سے 3کروڑ 90لاکھ 60 ہزار ڈالر اور ناروے، سوئٹزر لینڈ، آسٹریلیا، کینیڈا، جاپان اور دیگر ملکوں سے9کروڑ 74لاکھ 70 ہزار ڈالر کی ترسیلات زر موصول ہوئی تھیں۔