پاکستان کے ساتھ کرکٹ بھارت گیدڑ بھبکیوں سے دباؤ ڈالنے لگا

پی سی بی نے ’’دیکھو اور انتظارکرو‘‘ کی پالیسی اپنا لی۔ فوٹو: فائل

---

پاکستان سے کرکٹ کے معاملے پر بھارت گیڈربھبکیوں سے دباؤ ڈالنے لگا، ویمنز چیمپئن شپ میں پوائنٹس کی کٹوتی کے باوجود ہٹ دھرمی کم نہ ہوئی، روایتی حریف سے ویمنز ایشیا کپ میچ کے بائیکاٹ کا شوشہ چھوڑ دیا گیا ہے، حکام نے 29 نومبرکو شیڈول میچ کے حوالے سے غیریقینی کو برقرار رکھا ہوا ہے، جوائنٹ سیکریٹری امیتابھ چوہدری نے کہاکہ ہماری ویمنز ٹیم ایونٹ میں شریک ہوگی مگر گرین شرٹس سے میچ کے حوالے سے کچھ نہیں بتایا جا سکتا۔

دوسری جانب پی سی بی نے معاملے پر ''دیکھو اور انتظارکرو'' کی پالیسی اپنا لی، ایک آفیشل کا کہنا ہے کہ اگر بھارت نے میچ کے بائیکاٹ کا اعلان کیا تب ہی عوامی سطح پر کوئی بیان دیں گے،فی الحال کچھ کہنا مناسب نہیں، ویمن میچز فورفیٹ ہونے سے بی سی سی آئی کو خاصا نقصان ہوا ہے۔ تفصیلات کے مطابق انٹرنیشنل کرکٹ کونسل نے ویمنز چیمپئن شپ میں بھارت کے پاکستان سے تین میچز نہ کھیلنے کی پاداش میں سیریز کو فورفیٹ قرار دیتے ہوئے تمام6 پوائنٹس گرین شرٹس کو دے دیے۔

یوں ٹیم بغیر کھیلے ہی فاتح قرار پائی،اس سزا پر آگ بگولا بھارتی کرکٹ حکام گیڈربھبکیوں سے دباؤڈالنے کی کوشش کر رہے ہیں، پہلے مینز چیمپئنز ٹرافی میں عدم شرکت کی بات ہوئی، اب روایتی حریف سے ویمنز ایشیا کپ میچ کے بائیکاٹ کا شوشہ چھوڑ دیا گیا ہے، حکام کی ہٹ دھرمی کم نہیں ہوئی اور وہ بدستور کھیل کو سیاست کی بھینٹ چڑھانے پر تلے ہوئے ہیں، گذشتہ روز یہ تو واضح کردیا گیاکہ ٹیم 26 نومبر سے 4 دسمبر تک بنکاک میں شیڈول ویمنز ایشیا کپ میں حصہ لے گی تاہم اسی ٹورنامنٹ میں پاکستان کے ساتھ 29 نومبر کو شیڈول میچ کے حوالے سے غیریقینی صورتحال کا خاتمہ کرنے سے صاف انکار کردیا گیا۔

بی سی سی آئی کے جوائنٹ سیکریٹری امیتابھ چوہدری نے کہاکہ فی الحال میں اس بات کی تصدیق کررہا ہوں کہ بھارتی ویمنز ٹیم ایشیا کپ میںحصہ لے گی لیکن آپ کو یہ نہیں بتا سکتا کہ وہ پاکستان کے خلاف میچ کھیلے گی یا نہیں۔ بلو شرٹس کا پہلا مقابلہ اتوار کو میزبان تھائی لینڈ سے ہوگا، دلچسپ بات یہ ہے کہ ایشین کرکٹ کونسل کی ویب سائٹ پر تمام ٹورنامنٹ کا مکمل شیڈول موجود ہے جس میں پاکستان اور بھارت کی ٹیموں کے درمیان میچ کو 'انٹرنیشنل ٹی 20 کااسٹیٹس دیا گیا جبکہ ایونٹ میں شریک کچھ ٹیموں کے باہمی مقابلے کو یہ اسٹیٹس حاصل نہیں ہے۔ اس صورت میں پاکستان کیساتھ کھیلنے سے انکار کی صورت میں بھارت کو مزید نقصان اٹھانا پڑسکتا ہے۔

دوسری جانب پاکستان کرکٹ بورڈ نے معاملے پر ''دیکھو اور انتظارکرو'' کی پالیسی اپنا لی، ایک آفیشل نے نام ظاہر نہ کرنے کی شرط پر بتایا کہ ویمن میچز فورفیٹ ہونے سے بی سی سی آئی کو خاصا نقصان ہوا اور وہ اسے اپنی توہین سمجھ رہا ہے، ہمیں خوشی ہے کہ آئی سی سی حکام نے ہمارا موقف تسلیم کیا، انھوں نے کہا کہ ہم کئی بار رابطے کی کوشش کرتے رہے مگر بھارتی بورڈ نے کسی ای میل کا جواب تک دینا مناسب نہ سمجھا، اسی بات نے ہمارا کیس مضبوط کیا اور آئی سی سی ٹیکنیکل کمیٹی نے حق میں فیصلہ دیا، اب اگر بی سی سی آئی نے ویمنز ایشیا کپ میچ کے بائیکاٹ کا اعلان کیا تب ہی عوامی سطح پر کوئی بیان دیا جائے گا،ابھی کچھ کہنا مناسب نہ ہوگا۔