شام یمن اور بحرین میں ایران دہشت گردوں کی معاونت کررہا ہے شاہ سلمان

عالمی برادری ایران کا سامنا کرنے کے لیے سعودی عرب کا ساتھ دے۔ شاہ سلمان فوٹو : فائل

---

سعودی عرب کے فرماں روا شاہ سلمان نے کہا ہے کہ شام، یمن اور بحرین میں ایران دہشت گردوں کو معالی معاونت کے ساتھ اسلحہ بھی فراہم کر رہا ہے اور ایران کا سامنا کرنے کے لیے عالمی برادری سعودی عرب کی مدد کرے۔

بین الاقوامی خبر رساں ادارے کے مطابق سعودی فرماں روا کی دعوت پر خلیجی ممالک کے سربراہان اور عرب لیگ کا اہم اجلاس آج اختتام پذیر ہوگیا۔ اجلاس میں عرب رہنماؤں نے خطے میں امن کو نقصان پہنچانے اور تیل بردار بحری جہازوں کو نشانہ بنانے پر ایران کی سخت مذمت کرتے ہوئے عالمی برادری سے ایران کے خلاف سخت اقدامات اٹھانے کا مطالبہ کردیا۔

اجلاس کے اعلامیے میں کہا گیا ہے کہ عرب رہنماؤں نے متفقہ طور پر ایران کے شام اور بحرین میں منفی کردار کی سخت الفاظ میں مذمت کی جب کہ ایران کے بیلسٹک میزائل کے تجربات پر تشویش کا اظہار بھی کیا گیا اور متحدہ عرب امارات کے تین جزیروں پر ناجائز طور پر قابض ہونے پر ایران کو باز رہنے کی تنبیہ کی گئی۔

Arab Summit final statement: Condemns the sabotage of 4 commercial ships in the Emirates.#Makkah #GCCArabSummit #MakkahSummitshttps://t.co/zkfjcwCBrV pic.twitter.com/YXsCugyH5d

— Arab News (@arabnews) May 30, 2019

سعودی فرماں روا شاہ سلمان نے اجلاس سے خطاب کرتے ہوئے کہا کہ سعودی عرب قیام امن کی ہرکوشش جاری رکھے گا لیکن اس کے لیے عالمی برادری کا تعاون بھی درکار ہوگا، ایران کو خلیج فارس میں کھلی جارحیت سے روکنا ہوگا اور یمن میں باغی دہشت گردوں کو اسلحہ و مالی معاونت کا سلسلہ بند کرانا ہوگا اور یہ سب عالمی برادری کے تعاون کے بغیر ممکن نہیں۔