پریتی ڈیسائی کی فلم ’’ون بائی ٹو‘‘ کا پہلا ٹریلر جاری

امید ہے لوگ اس فلم میں بھی میری پرفارمنس کو پسند کریں گے ، پریتی ڈیسائی۔ فوٹو: فائل

---

پریتی ڈیسائی اور ابھے دیول کی رومانوی اور کامیڈی فلم ''ون بائی ٹو'' کا ٹریلر جاری کر دیا۔ امیت کپور اور ابھے دیول کی مشترکہ پروڈکشن میں بنائی جانے والی فلم کی ہدایات دیویکا بھگت دے رہی ہیں۔

فلم کی دیگر کاسٹ میں رتی اگنی ہوتری، جیانت کرپلانی، دھرشن جاریوالا ،لیلت دوبے اور آنش ترویدی شامل ہیں۔ گزشتہ روز جاری ہونے والے فلم کے پہلے ٹریلرمیں ابھے دیول جو امیت شرما اور پریتی ڈیسائی شرما پاٹیل کے رول میں ہیں، مختلف مقامات پر رومانس کے ساتھ ساتھ آپس میں مزاح اور رقص کرتے دکھائے گئے ہیں۔اطلاعات کے مطابق اس فلم کو 31جنوری 2014ء کو ریلیز کرنے کا اعلان کیا گیا تھا مگر اب اسے سات دن بعد یعنی 7فروری کو سینما گھروں کی زینت بنایا جا رہا ہے۔ اس سلسلہ میں بتایا گیا ہے کہ ابھے دیول جن کی فلم ''ڈیو ڈی'' جو 6 فروری2009ء کو ریلیز ہوئی تھی اور کافی کامیاب رہی تھی، اب اس فلم کو بھی اپنے اسی لکی دن کے مطابق نمائش کے لیے پیش کرنا چاہتے ہیں۔ اس لیے انھوںنے اپنے بھائی سنی دیول کے ساتھ مشورے کے بعد اس فلم کی ریلیز میں تاخیر کی ہے۔ اس کی ایک وجہ یہ بھی بتائی جارہی ہے کہ اسی دن سنی دیول کی بھی فلم سینما گھروں کی زینت بنائی جارہی ہے اور اسی وجہ سے ابھے نے ان کے کہنے پر اپنی فلم کی ریلیز میں تاخیر کردی ہے۔

پریتی ڈیسائی کا کہنا ہے کہ بالی ووڈ میں ابھی نئی ہوں کیونکہ ابھی تک میری صرف ایک ہی فلم ''شور ان دی سٹی'' سینما گھروں کی زینت بن سکی ہے۔ یہ فلم گو کہ زیادہ کامیابی تو حاصل نہیں کرسکی تھی مگر اس میں میری پرفارمنس کو سراہا گیا جب کہ ایک فلم کی ریلیز التوا کا شکار ہے۔ اپنی نئی فلم کے متعلق گفتگو کرتے ہوئے اداکارہ نے کہا کہ فلم کی کہانی اچھی ہے۔ اس میں شائقین کو رومانس کے ساتھ ساتھ کامیڈی بھی دیکھنے کو ملے گی اور یقینا اسے پسند کریں گے۔ ایک سوال کے جواب میں اداکارہ کا کہنا تھا کہ بالی ووڈ میں رہنے کے لیے ایک اداکارہ کے لیے رقص پر عبور رکھنا ضروری ہوتاہے اور اسی بات کو مدنظر رکھتے ہوئے میں نے بھی دوسری اداکارائوں کی طرح باقاعدہ رقص کی تربیت حاصل کی ہے۔ ابھے کے متعلق سوال کے جواب میں پریتی ڈیسائی کا کہنا تھا کہ ''ون بائی ٹو'' ابھے دیول کے ساتھ میری دوسری فلم ہے۔ وہ میرے بہت اچھے دوست ہیں اور بہت سے مواقعوں پر میرا ساتھ دیتے ہیں۔ اس فلم میں بھی انھوں نے میرا بہت ساتھ دیا ہے۔



اداکارہ کا کہنا تھا کہ میں اس فلم کے لیے بہت محنت کررہی ہوں، امید ہے یہ شائقین کو پسند آئے گی۔ واضح رہے کہ پریتی ڈیسائی 29 ستمبر 1984ء کوبرطانیہ میں پیدا ہوئیں، ابتدائی تعلیم آرسی پرائمری اسکول کولبے نیوھام میں حاصل کرنے کے بعد پریتی نے ننتھرپ کے سکینڈری اسکول میں داخلہ لے لیا اور پھر وہان سے مڈلزبرگ کالج میں تعلیم حاصل کرنے چلی گئیں۔2007ء میں پریتی ڈیسائی نے مس گریٹ برطانیہ کا تاج اپنے سر پر سجاکر پہلی مرتبہ کسی بھارتی نژاد لڑکی کے لیے یہ اعزاز حاصل کرنے کی تاریخ رقم کی۔ اطلاعات کے مطابق انھیں پہلے سے مقابلہ جیتنے والی حسینہ کے نااہل ہونے کی وجہ سے برطانیہ بھر سے ملنے والی رائے شماری کے بعد مس برطانیہ منتخب کیا گیا۔ 2008ء میں پریتی بھارت آگئی اور ماڈلنگ سے اپنے شوبز کیریئر کی ابتداکی اور ان کا پہلی ہی فوٹوشوٹ جو سپر اسٹار شاہ رخ خان کے ساتھ کیا گیا، نے اسے شہرت کے زینہ پر چڑھا دیا۔ اکتوبر 2009ء میں اسے ہرتیک روشن کے ساتھ ماڈلنگ کا موقع ملا۔

اس کے بعد وہ متعدد غیرملکی ڈیزائنر کے ملبوسات کی نمائش میں بطور ماڈل شرکت کرتی رہی اور دوسال تک بھارت کی ایک سپرماڈل کے طور پر جانی جاتی رہی۔ 2011ء میں اس کی پہلی فلم ''شور ان دی سٹی'' سینما گھروں کی زینت بنائی گئی۔ ایکتاکپور کی پروڈکشن میں تیار ہونے والی اس فلم میں پریتی ڈیسائی نے بھارتی نژاد امریکی اداکار سندھل راما مورتی کے مدمقابل فوٹو جرنلسٹ شالمیلی کا کردار ادا کیا تھا۔ راک نیدیمور اور کرشنا ڈی کے کی مشترکہ ہدایتکاری میں بنائی جانے والی اس فلم میں ڈیسائی کی اداکاری کو سراہا گیا اور اسے 2012ء میں نیویارک میں ہونے والے سائوتھ ایشن انٹرنیشنل فلم فیسٹیول میں جنوبی ایشیاء کی بہترین ابھرتی ہوئی مرکزی اداکارہ کے ایوارڈ کے لیے نامزد کیا گیا۔ بھارتی میڈیا کے مطابق اداکارہ فلم ''راک دی شادی'' میں کیمو اپیرنس دے رہی ہیں تاہم کچھ وجوہات کی بنا پر یہ التوا کا شکار ہے۔