چور اولمپئن سمیع اللہ کے مجسمے کی ہاکی اور گیند لے اڑے

یہ مجسمہ چند روز قبل ہی کنٹونمنٹ بورڈ بہاولپور کی جانب سے سمیع اللہ خان کے فلاحی اسپتال کے قریب نصب کیا گیا تھا۔(فوٹو:ایکسپریس)

---

دنیائے ہاکی میں فلائنگ ہارس کے نام سے معروف پاکستان ہاکی ٹیم کے سابق کپتان اولمپئن سمیع اللہ خان نے بہاولپور میں اپنے مجسمے کے ساتھ توہین آمیز سلوک پر اظہار افسوس کیا ہے۔

چور اولمپیئن سمیع اللہ خان کے آبائی شہر بہاولپور میں ان کے مجسمے کے ساتھ رکھی جانے والی ہاکی اور گیند اٹھا کر لے گئے، واضح رہے کہ چند روز قبل کنٹونمنٹ بورڈ بہاولپور کی جانب سے سمیع اللہ خان کے فلاحی اسپتال کے قریب ان کا مجسمہ نصب کیا گیا تھا۔ جس کا مقصد فلائنگ ہارس سمیع اللہ خان کی پاکستان ہاکی کے لیے گراں قدر خدمات کوخراج تحسین پیش کرنا تھا۔

اس بارے میں سمیع اللہ خان کا کہناہے کہ مجھے سوشل میڈیا کے ذریعے اس ناروا سلوک کا علم ہوا، جس نے بھی یہ حرکت کی ہے یہ اچھی بات نہیں ہے۔ ہاکی اور گیند لے جانے والے سے میری درخواست ہے کہ وہ مجسمے کے ساتھ ہاکی اور گیند کو واپس رکھ دیں۔

ادھر بہاولپور انتظامیہ نے بروقت اقدام کرتے ہوئے اولمپئن سمیع اللہ خان کے مجسمے کے ساتھ دوبارہ ہاکی اسٹک اور گیند رکھ دی ہے۔

دوسری جانب سابق قومی کپتان اولمپئین حنیف خان، منظور جونئیر، شہناز شیخ،ناصر علی،احمد عالم، رشید الحسن و دیگر نے اس واقعے پر افسوس کا اظہار کرتے ہوئے اسے قومی اسٹارز کی تذلیل قرار دیا ہے۔