فی تولہ سونے کی قیمت میں 1700 روپے کا غیرمعمولی اضافہ

ویب ڈیسک  پير 18 اکتوبر 2021
فی تولہ سونا اضافے سے 119700 روپے اور 10 گرام سونے کی قیمت  بڑھا کر 102623 کردی گئی - فوٹو:فائل

فی تولہ سونا اضافے سے 119700 روپے اور 10 گرام سونے کی قیمت  بڑھا کر 102623 کردی گئی - فوٹو:فائل

کراچی: مقامی صرافہ مارکیٹوں میں سونے کی فی تولہ قیمت میں 1700 روپے کا غیر معمولی اضافہ ہوگیا۔ 

بین الاقوامی بلین مارکیٹ میں سونے کی فی اونس قیمت میں 4 ڈالر کی کمی ہوئی اور عالمی مارکیٹ میں سونے کی فی اونس قیمت کم ہوکر 1767 ڈالر پر آگئی، اس کے برعکس پاکستان کی صرافہ مارکیٹوں میں کاروباری ہفتے کے پہلے ہی روز سونے کی فی تولہ اور دس گرام قیمت میں بالترتیب 1700 روپے اور 1457 کا اضافہ ہوگیا۔

قیمتوں میں اضافے کے نتیجے میں کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھنے کے بعد 1 لاکھ 19 ہزار 700 روپے کی سطح پر پہنچ گئی، جب کہ فی دس گرام سونے کی قیمت اضافے کے  بعد 1 لاکھ 2 ہزار 623 روپے کردی گئی۔

 

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔