کراچی شراب پی کر وارداتیں کرنیوالے گروہ کے 3 کارندے گرفتار

ملزمان سے موبائل فون، اسلحہ، نقدی اور موٹرسائیکل برآمد کرلی گئی (فوٹو فائل)

---

پولیس نے شراب پی کر وارداتیں کرنے والے گروہ کے 3 کارندے گرفتار کرلیے۔

ایکسپریس نیوز کے مطابق بلال کالونی پولیس نے 100 سے زائد وارداتیں کرنے والے گروہ کے 3 کارندوں کو گرفتار کرلیا، جن کے قبضے سے چھینے ہوئے 20 موبائل فونز ، 4 ٹی ٹی پستول، 12 ہزار روپے نقد اور ایک موٹر سائیکل برآمد کرلی گئی۔

پولیس کے مطابق گرفتار ملزمان میں خادم لنگڑا ، نعیم اور اعظم کمانڈو شامل ہیں۔ ملزمان زیادہ تر وارداتیں شراب پی کر کرتے تھے جب کہ یہ پہلے بھی گرفتار ہوکر جیل جاچکے ہیں ، تاہم ضمانت پر آنے کے بعد دوبارہ وارداتیں کررہے تھے ۔

ترجمان پولیس کا کہنا ہے کہ ملزمان زیادہ تر وارداتیں ضلع وسطی کے علاقے میں کرتے تھے ۔