پبلک سروس کمیشن رکاوٹ بن گیا شہری کوٹے پر اہل امیدوار بھرتی سے محروم

دیہی کوٹے پرمعذورامیدواروں کوشہری کوٹے کی خالی نشستیں دی گئیں ،انٹرویو پینل میں کراچی کے کسی تعلیمی ادارے سے سبجیکٹ اسپیشلسٹ شامل نہیں کیے گئے فوٹو؛فائل

---

صوبے کے سرکاری محکموں میں '' گزیٹڈ اسامیوں'' پر بھرتی کے لیے ٹیسٹ اور انٹرویوکرنے والے ادارے پبلک سروس کمیشن نے شہری کوٹے کے اہل امیدواروں کو سرکاری کالجوں میں بھرتیوں سے روکنے کا بیڑا اٹھالیا۔

کمیشن کی جانب سے گزشتہ 3برسوں کے دوران مختلف مضامین کی شہری کوٹے کی 52سے زائد نشستیں اہل امیدواروں کی موجودگی میں خالی چھوڑدینے کا انکشاف ہوا ہے، اس کے برعکس دیہی علاقوں کے امیدواروں کی مختص 170سے زائد نشستوں میں سے تمام کو پرکردیا گیا ہے،شہری کوٹے کی کئی خالی نشستوں پر دیہی علاقوں کے معذورافراد کو بھرتی کردیا گیاہے، خالی رہ جانے والی شہری علاقوں کی نشستوں پر '' شہری ودیہی کوٹے''کا از سرنوفارمولا لگا کر انھیں دوبارہ مشتہرکیا جارہاہے،شہری کوٹے کے امیدواروں کوروکنے کے لیے گزشتہ برسوں میں کسی بھی انٹرویومیں سبجیکٹ اسپیشلسٹ کے طور پر ایک امیدوارکی بھی کراچی کی جامعات یا کالجوں سے انٹرویو پینل میں شامل نہیں کیاگیا اورتمام کے تمام سبجیکٹ اسپیشلسٹ دیہی سندھ یونیورسٹی سے پینل میں شامل کیے گئے ہیں،حیرت انگیز امر یہ ہے کہ کراچی کے تعلیمی اداروں سے ماسٹرزکرنے والے امیدوار انٹرویو میں کامیاب نہیں ہوتے، اس کے برعکس دیہی علاقوں سے ماسٹرز کرنے والے تمام امیدوارکامیاب ہو جاتے ہیں۔

سندھ پبلک سروس کمیشن کے ایک سابق رکن نے '' ایکسپریس'' کوبتایا کہ8 اکتوبر 2011 میں سرکاری کالجوں میں ''کیمیا'' کے مضمون کی مختص 57 میل نشستوں پر بھرتیوں کے لیے نوٹیفکیشن جاری کیا گیا،مرد امیدواروں کے لیے مختص نشستوں میں سے شہری کوٹے کی 23 اور دیہی کوٹے کی 34نشستیں تھیں، سندھ پبلک سروس کمیشن نے دیہی کوٹے کی تمام نشستوں پر بھرتیوں کی سفارش کردی،شہری کوٹے کی صرف 16نشستوں پر امیدواروں کوکامیاب قرار دیا گیا اور7نشستیں خالی چھوڑدی گئیں مزیدبراں 2012 میں جاری کیے گئے اشتہارمیں ''نباتیات''کے مضمون کی 55 میل نشستیں مختص کی گئیں،اس سلسلے میںٹیسٹ اورانٹرویو کے بعدگزشتہ برس23دسمبر2013کوایک نوٹیفکیشن جاری کیاگیا اوراس موقع پرنباتیات کے مضمون کے لیے مختص دیہی کوٹے کی تمام 33 نشستیں تومتعلقہ کوٹے کے امیدواروں سے پوری کردی گئیں شہری کوٹے کی مختص 22میں سے صرف 6 نشستوں پربھرتیاں کی گئیں شہری کوٹے کے باقی امیدواروں کو انٹرویو میں نااہل قراردیتے ہوئے ایک بارپھر15نشستیں خالی چھوڑدی گئیں۔

حیرت انگیزطورپراس موقع پرجب کمیشن دیہی کوٹے کی تمام نشستوں کو پرکرچکا تو شہری کوٹے کی ایک نشست لے کراس پردیہی کوٹے سے معذورامیدوارکوبھرتی کردیاگیا2012کے اسی اشتہارمیں سندھ پبلک سروس کمیشن نے ''مطالعہ پاکستان '' کے مضمون کی 44 میل نشستیں مختص کیں، اس سلسلے میں بھرتیوں کی سفارش کانوٹیفکیشن 25 اپریل 2013کوجاری کیاگیااس نوٹیفکیشن میں بھی دیہی کوٹے کے لیے مختص 27نشستیں متعلقہ امیدواروں سے پر کردی گئیں،شہری کوٹے کیلیے مختص 17میں سے 4پربھرتی کرکے باقی 13نشستیں ایک بارپھرخالی چھوڑدی گئیں مزید براں مذکورہ اشتہارمیں ہی ''حیوانیات''کے مضمون کی 60میل نشستیں مختص کی گئیں تھیں کل مختص نشستوں میں سے دیہی کوٹے کی 36 نشستیں مختص تھیں جنھیں پرکردیا گیا ۔

شہری کوٹے کی 24 میں سے 12نشستوں پربھرتیاں کی گئیں اور12ہی خالی چھوڑی گئیںمتعلقہ نوٹیفکیشن رواں سال 10جنوری کوجاری ہوا، کمیشن کی جانب سے یہ سلسلہ جاری رہا اور''نباتیات''کے مضمون کی فیمیل کی مختص کل 67نشستوں میں سے دیہی کوٹے کے لیے 41نشستیں مختص کی گئیں جونہ صرف پوری کی گئیں بلکہ دیہی کوٹے کی معذورامیدوارکی ایک نشست شہری کوٹے میں ڈال دی گئی، اس نوٹیفکیشن میں شہری کوٹے کے لیے مختص 26نشستوں میں سے 21 کو پر کیا گیا اور5 ایک پھر خالی چھوڑی گئیں، قابل ذکرامریہ ہے کہ متعلقہ مضامین کے انٹرویوکے لیے سندھ پبلک سروس کمیشن نے جوپینل ترتیب دیا ہے۔

اس میں سے کسی بھی پینل میں جامعہ کراچی سمیت کراچی کے کسی دوسرے تعلیمی ادارے سے ''سبجیکٹ ایکسپرٹ''کوشامل ہی نہیں کیاگیا،نباتیات کے مضمون کے لیے منعقدہ انٹرویومیں گورنمنٹ ڈگری کالج شہدادپورکے پروفیسراحمد علی سومرواورانسٹی ٹیوٹ آف پلانٹ سائنسزسندھ یونیورسٹی جامشوروکی پروفیسرڈاکٹرامینہ کبیرکوشامل کیاگیا، حیوانیات کے لیے منعقدہ انٹرویومیںگورنمنٹ کالج مٹھی کے پروفیسرجہانگیر اور ڈائریکٹرپرائیویٹ انسٹی ٹیوشنزحیدرآباد ریجن پروفیسربرکات حیدرکوپینل میں شامل کیاگیا،کمپیوٹرسائنس کے لیے منعقدہ انٹرویومیں انسٹی ٹیوٹ آف میتھ میتھکس اینڈ کمپیوٹرسائنس سندھ یونیورسٹی جامشوروکے پروفیسرڈاکٹرایازحسین کیریوکوشامل کیاگیا ۔