ڈائٹ سافٹ ڈرنکس کی مٹھاس کینسر کی وجہ بن سکتی ہے عالمی ادارہ صحت
چیونگم اور سافٹ ڈرنکس کو میٹھا بنانے والے سب سے عام مصنوعی مٹھاس ایسپرٹیم سرطان کی وجہ قرار
عالمی ادارہ برائے صحت نے خبردار کیا ہے کہ بالخصوص ڈائٹ سافٹ ڈرنکس میں شامل ایک مصنوعی مٹھاس درحقیقت کینسر آور (کارسینوجن) کیمیکل ہے۔
ایسپرٹیم نامی مصنوعی مٹھاس بالخصوص کوکا کولا ڈائیٹ اور مارس ایکسٹرا چیونگم سمیت کئی اشیا میں شامل کی جاتی ہے۔ عالمی ادارہ برائے صحت (ڈبلیو ایچ او) کے مطابق جولائی میں اسے 'ممکنہ طورپرکارسینوجن' کیمیکل میں شامل کیا گیا تھا۔ یہ اصطلاح ایسے اجزا کے لیے استعمال کی جاتی ہے جو سرطان کی وجہ بن سکتے ہیں۔
یہ تحقیق بین الاقوامی ایجنسی برائے کینسر ریسرچ (آئی اے آرسی) نے کی ہے جو عالمی ادارہ برائے صحت کا ذیلی ادارہ بھی ہے۔
واضح رہے کہ آئی اے آر سی نے مختلف ماہرین پر مشتمل پینل سے مذاکرات کے بعد یہ فیصلہ کیا ہے۔ اس ضمن میں شائع شدہ تحقیقات کا جائزہ بھی لیا گیا ہے اور یوں ایسپرٹیم کو سرطان والی مٹھاس میں شامل کیا گیا ہے۔
ڈبلیو ایچ او کی جانب سے غذائی اجزا (فوڈ ایڈیٹوز) پرنظررکھنے والا ذیلی ادارہ جے ای اسی ایف اے ایسپرٹیم پر اپنی عوامی سماعت 14 جولائی کو کرے گا۔ اس اعلامئے کے بعد مزید تفصیلات منظرِ عام پر آسکیں گی۔
