الطاف حسین کے شناختی کارڈ کا ڈیٹا ضائع ہوگیا وزیر مملکت برائے داخلہ

واجدشمس الحسن نےقواعد کےبرعکس الطاف حسین کا گھرجاکرڈیٹا حاصل کیا ، بلیغ الرحمان فوٹو: فائل

---

وزیر مملکت برائے داخلہ میاں بلیغ الرحمان نے کہا ہے کہ ایم کیو ایم کے قائد الطاف حسین کے شناختی کارڈ کا ڈیٹا ضائع ہوگیا ہے۔

قومی اسمبلی میں نکتہ اعتراض کا جواب دیتے ہوئے وزیر مملکت برائے داخلہ برائے میاں بلیغ الرحمان نے ایوان کو بتایا کہ الطاف حسین کو پاسپورٹ جاری کردیں گے،حکومت کو اس میں کوئی قباحت نہیں لیکن برطانیہ میں تعینات پاکستان کے ہائی کمشنر واجد شمس الحسن نے قواعد کے برعکس الطاف حسین کا گھر جاکر ڈیٹا حاصل کیا۔ جن لوگوں نے ڈیٹا حاصل کیا وہ معیار کے مطابق ریکارڈ نہیں ہوا۔ کل تک بھی ڈیٹا سسٹم میں اپ لوڈ نہیں ہوا تھا۔ ایم کیو ایم کے پارلیمانی لیڈر عبدالرشید گوڈیل نے قومی اسمبلی اور میڈیا کے سامنے جو فارم دکھایا ہے وہ ان کے پاس بھی موجود ہے۔ ڈیٹا کی معیاد ایک ماہ ہوتی ہے اب وہ ضائع ہوگیا ہے، اس لئے الطاف حسین سے گزارش کی ہے کہ وہ پاکستانئی ہائی کمیشن آئیں اورڈیٹا دیں۔

قومی اسمبلی میں ایم کیو ایم کےپارلیمانی لیڈر عبدالرشید گوڈیل نے کہا کہ حکومت کی جانب سے کھسیانی بلی، کھمبا نوچے کا رویہ اختیار کیا جا رہا ہے، یمارے پاس پورا ریکارڈ موجود ہے، نہ جانے کسے بے وقوف بنایا جارہا ہے۔ ان کا کہنا تھا کہ ڈیٹا 10 سال تک کہیں نہیں جاتا اور الطاف حسین کا ڈیٹا ویب سائٹ پر موجود ہے اگر وزارت داخلہ کی جانب سے ایوان میں غلط بیانی نہ کی جائے ورنہ باہر دھرنا دیں گے۔