لاہور کے علاقہ تھانہ شفیق آباد میں تین سالہ بچی کو اغوا کر کے قتل کرنے والا ملزم اپنے ہی ساتھیوں کی فائرنگ سے ہلاک ہوگیا۔
تفصیلات کے مطابق انسپکٹر عمران یوسف اور ان کی ٹیم ملزم ارسلان کو علاقہ تھانہ شفیق آباد لے جارہی تھی کہ نامعلوم ملزمان نے اپنے زیر حراست ساتھی اغوا کار کو چھڑوانے کے لیے پولیس پارٹی پر اندھا دھند فائرنگ کردی، ملزم کے ساتھیوں کی فائرنگ سے اغوا کار ارسلان شدید زخمی ہو گیا جس کو اسپتال منتقل کیا جا رہا تھا کہ راستے میں ہی دم توڑ گیا جبکہ ملزمان کی فائرنگ سے پولیس اہلکار معجزانہ طور پر محموظ رہے۔
ڈی ایس پی چوہدری فیصل شریف کے مطابق ہلاک ہونے والے ملزم نے تین سالہ معصوم بچی کو اغوا کرکے بے دردی سےقتل کر دیا تھا اور بچی کی لاش کو گندے نالے میں پھینک دیا تھا۔
نامعلوم ملزمان کی فائرنگ سے سرکاری گاڑی کو شدید نقصان پہنچا ہے جبکہ فائرنگ کرنے والے ملزمان اندھیرے کا فائده اٹھاتے ہوئے فرار ہوگئے جن کی گرفتاری کے لیے علاقہ میں سرچ آپریشن جاری ہے۔