ہالی ووڈ میں بطور چائلڈ اسٹار قدم رکھنے والی معروف امریکی اداکارہ مشیل ٹریچٹن برگ 39 سال کی عمر میں انتقال کرگئیں۔
غیر ملکی خبر رساں ادارے کی رپورٹ کے مطابق اداکارہ مشیل ٹریچٹن برگ اپنے ڈرامے ’بفی دی ویمپائر سلیئر‘ اور ’گوسپ گرل‘ کیلئے مشہور تھیں۔ اداکارہ کو ان کے گھر میں مردہ حالت میں پایا گیا ہے۔
پولیس کا کہنا ہے کہ انہیں بدھ کی صبح 8 بجے نیویارک سٹی میں ان کے اپارٹمنٹ سے ایک ایمرجنسی کال موصول ہوئی، جہاں پہنچ کر پولیس نے مشیل ٹریچٹن کو بے ہوش پایا۔ تاہم طبی عملے نے موقع پر ہی ان کی موت کی تصدیق کر دی تھی۔
پولیس کے مطابق ابتدائی تحقیقات میں کسی مجرمانہ سرگرمی کا شبہ نہیں ہے کیونکہ اداکارہ طبی مسائل کا شکار تھیں تاہم ان کی موت کی اصل وجہ میڈیکل ایگزامینر کے دفتر سے آئے گی۔
ذرائع نے بتایا کہ مشیل جگر کے مرض میں مبتلا تھیں اور حال ہی میں جگر کی پیوند کاری بھی کروائی تھی اس لئے ممکن ہے کہ ان کی موت طبعی ہو۔
دوسری جانب اداکارہ کے اہل خانہ نے اس دکھ کی گھڑی میں پرائیویسی فراہم کرنے کی درخواست کرتے ہوئے کوئی بھی تبصرہ کرنے سے انکار کیا ہے۔
