دبئی میں پاکستانی ٹیکسی ڈرائیور نے خاتون چینی سیاح سے حسنِ سلوک اور مہمان نوازی کی روشن مثال قائم کرکے ملک و قوم کا نام روشن کردیا۔
عرب میڈیا کے مطابق دبئی کی روڈز اینڈ ٹرانسپورٹ اتھارٹی (RTA) نے پاکستانی ٹیکسی ڈرائیور فلک نیاز خان کو تعریفی اسناد اور انعام سے نوازا ہے۔
یہ اعزاز اس وقت دیا گیا جب سوشل میڈیا پر ایک ویڈیو وائرل ہوئی، جس میں فلک نیاز خان کو خاتون چینی سیاح کا استقبال ان کی مقامی زبان منڈارین میں خیرمقدمی کلمات ادا کرکے کرتے ہیں۔
ویڈیو میں پاکستان سے تعلق رکھنے والے ڈرائیور فلک خان چینی خاتون سیاح کا سامان ٹیکسی میں رکھواتے ہیں اور نہایت خوش اخلاقی سے بات چیت کرتے ہیں۔
چینی خاتون بھی اپنی مقامی زبان میں گفتگو کرتے ڈرائیور کو پاکر کافی خوش نظر آتی ہیں اور پوچھتی ہیں کہ "کیا آپ پاکستان سے ہیں؟" جس پر فلک خان نے مسکرا کر کہا "جی ہاں"۔ دونوں نے گاڑی میں بیٹھ کر ایک سیلفی بھی لی۔
منزل پر پہنچنے کے بعد فلک نیاز خان نے ایک بار پھر گاڑی سے اتر کر خاتون سیاح کا سامان نکالا اور منڈارین زبان میں نہایت مہذب اور پیشہ ورانہ انداز میں خاتون کو رخصت کیا۔
دبئی کے ادارے RTA کے ڈائریکٹر جنرل اور ایگزیکٹو بورڈ کے چیئرمین نے پاکستانی ڈرائیور کو ایک خصوصی تقریب میں تعریفی سند پیش کی اور انعام بھی دیا۔
انھوں نے کہا کہ فلک خان نے دبئی میں سیاحوں کی بہترین مہمان نوازی کی عکاسی کرتے ہوئے دبئی کے عوام کے مثالی اخلاق اور خدمات کے جذبے کی نمائندگی بھی کی۔
