شہر قائد پر آج اور کل بادلوں کاڈیرا رہے گا جب کہ پیر سے تیز ہوائیں چلنے کی پیش گوئی کی گئی ہے۔
محکمہ موسمیات کے مطابق پیر کے روز کراچی میں معمول سے تیز ہوائیں چلنے کا امکان ہے جب کہ آج اور کل یعنی اتوار کو شہر کا موسم جزوی طور پر ابر آلود اور مرطوب رہے گا۔
موسمیاتی آؤٹ لک کے مطابق سندھ کے بیشتر علاقوں میں موسم گرم اور مرطوب رہنے کا امکان ہے۔
کراچی سمیت صوبے کے دیگر ساحلی مقامات پر مطلع جزوی طور پر ابر آلود رہنے کے ساتھ ساتھ ہلکی بوندا باندی کی بھی پیشگوئی کی گئی ہے، جو مرطوب فضا کو مزید بھاری بنا سکتی ہے۔
دوسری جانب ملک کے بالائی علاقوں میں جاری موسلادھار بارشوں کے نتیجے میں دریائے سندھ کے گڈو اور سکھر بیراج پر نچلے درجے کا سیلاب ریکارڈ کیا گیا ہے۔ محکمہ موسمیات کے مطابق ان علاقوں میں پانی کی آمد اور اخراج میں اضافہ ہوا ہے، جس پر متعلقہ ادارے نظر رکھے ہوئے ہیں، تاہم کوٹری بیراج پر پانی کی سطح اور بہاؤ تاحال معمول کے مطابق ہے۔
محکمہ موسمیات نے شہریوں کو ہدایت کی ہے کہ وہ موسم سے متعلق اپ ڈیٹس پر نظر رکھیں اور کسی بھی ممکنہ ہنگامی صورتحال کے پیش نظر احتیاطی تدابیر اختیار کریں۔
