مصر اور لیور پول کے لیجنڈ کھلاڑی محمد صلاح نے تیسری مرتبہ سال کے بہترین پروفیشنل فٹبالر کا ایوارڈ جیت لیا۔
پروفیشنل فٹبالرز ایسوسی ایشن کی جانب سے 33 سالہ محمد صلاح کو سال کا بہترین فٹبالر قرار دیا گیا۔
2017 میں لیورپول میں شامل ہونے والے محمد صلاح نے پریمیئر لیگ کے گزشتہ سیزن میں نہ صرف سب سے زیادہ 29 گول اسکور کیے بلکہ 18 گول اسسٹ بھی کیے اور اپنی ٹیم کو ٹائٹل جتوانے میں اہم کردار ادا کیا۔
وہ پہلے ہی پریمیئر لیگ پلیئر آف دی سیزن، سب سے زیادہ گول کرنے پر گولڈن بوٹ اور سب سے زیادہ اسسٹ کے لیے پلے میکر ایوارڈ اپنے نام کر چکے ہیں۔
محمد صلاح ایک ہی سیزن میں یہ تینوں ایوارڈ جیتنے والے پہلے کھلاڑی بن گئے ہیں۔
اس سے قبل محمد صلاح 2018 اور 2022 میں بھی بہترین پروفیشنل فٹبالر کا ایوارڈ اپنے نام کرچکے ہیں۔
