مشیر اطلاعات بیرسٹر ڈاکٹر سیف نے افغان سفیر سردار احمد شکیب سے ملاقات کی، ملاقات میں باہمی دلچسپی کے امور پر تفصیلی تبادلہ خیال کیا گیا۔
ملاقات میں خطے میں امن و استحکام کے لئے دونوں ممالک کے کردار پر گفتگو ہوئی، امن کے قیام کے لئے خیبر پختونخوا حکومت کے اقدامات پر بھی تفصیلی گفتگو ہوئی۔
بیرسٹر ڈاکٹر سیف نے کہا کہ وزیراعلیٰ علی امین گنڈاپور کی قیادت میں صوبائی حکومت دہشت گردی کے خاتمے کے لئے سنجیدہ اقدامات کر رہی ہے، امن و امان کے قیام میں افغانستان کا کردار کلیدی ہے۔
ملاقات میں تجارت اور معیشت کی مضبوطی پر تفصیلی بات چیت ہوئی، افغان سفیر سردار احمد شکیب نے کہا کہ طورخم بارڈر پر تجارتی سہولیات بڑھانے کی ضرورت ہے، تجارت بڑھانے اور معیشت کی مضبوطی سے خطے میں امن اور خوشحالی کا فروغ ہو گا۔
