کراچی:
ڈیرہ اسماعیل خان میں پولیس مقابلے کے دوران فائرنگ سے ایک ڈاکو ہلاک ہوگیا۔
سفیدا مائنز کے قریب ڈاکوؤں کی موجودگی کی اطلاع پر پروآ سرکل پولیس نے فوری ایکشن لیا۔ کارروائی کے دوران پولیس اور ڈاکوؤں کے درمیان فائرنگ کا تبادلہ ہوا جس میں ڈاکوؤں نے پولیس موبائل کو نشانہ بنایا۔
پولیس کی جوابی فائرنگ سے ایک ڈکیت ہلاک ہوگیا جس کی شناخت بلال عرف بلا ولد اقبال سکنہ لنڈہ پاڑا کے نام سے ہوئی۔ پولیس نے موقع سے کلاشنکوف بمعہ ایمونیشن اور ایک موٹرسائیکل بھی برآمد کرلی۔
ڈی پی او ڈیرہ کے مطابق ہلاک ملزم بدنام زمانہ عمری گروپ کا کمانڈر تھا اور پولیس پر حملوں، ڈکیتی، چوری اور اقدام قتل سمیت 22 مقدمات میں مطلوب تھا۔
ڈی پی او ڈیرہ نے ڈی ایس پی پروآ، ایس ایچ او پروآ اور پوری پولیس ٹیم کو بروقت کارروائی پر شاباش دی۔
