نیویارک:
وزیراعظم شہباز شریف اور امریکی صدر ڈونلڈ ٹرمپ کے درمیان باضابطہ ملاقات آج وائٹ ہائوس میں ہوگی جس کے لیے وزیراعظم نیویارک سے واشنگٹن روانہ ہوگئے۔
اطلاعات کے مطابق وزیراعظم شہبازشریف نیویارک کے جان ایف کینیڈی ائیرپورٹ سے واشنگٹن کیلئے روانہ ہوئے، وہ پہلے واشنگٹن میں پاکستانی سفارت خانے جائیں گے پھر وہ سفارت خانے سے وائٹ ہاؤس میں صدر ڈونلڈ ٹرمپ سے ملنے جائیں گے۔
وزیراعظم شہباز شریف صدر ٹرمپ سے ملاقات کے بعد واپس نیویارک آئیں گے اور اگلے روزاقوام متحدہ کی جنرل اسمبلی اجلاس سے خطاب کریں گے۔
وزیراعظم کے ساتھ آرمی چیف فیلڈ مارشل سید عاصم منیر اور دیگر حکام بھی ملاقات میں شریک ہوں گے۔
ملاقات میں دوطرفہ تعلقات، تجارت، علاقائی، عالمی امور، افغانستان، خطے کی صورتحال، انسداد دہشت گردی کے حوالے سے تعاون سمیت مختلف امورپر تبادلہ خیال کیا جائے گا۔
