لاہور:
شدید دھند کے باعث ملک کی مختلف اہم موٹرویز کو ٹریفک کے لیے بند کر دیا گیا ہے۔
ترجمان موٹروے پولیس سنٹرل ریجن کے مطابق موٹروے ایم ٹو لاہور سے کوٹ مومن تک دھند کے باعث بند ہے، جبکہ موٹروے ایم تھری لاہور سے درخانہ تک بھی ٹریفک کے لیے بند کر دی گئی ہے۔
ترجمان کے مطابق لاہور سیالکوٹ موٹروے ایم الیون کو بھی شدید دھند کے باعث بند کر دیا گیا ہے، اسی طرح موٹروے ایم فور پنڈی بھٹیاں سے عبدالحکیم تک اور موٹروے ایم فائیو ملتان سے روہڑی تک دھند کے باعث بند ہیں۔
موٹروے پولیس ترجمان کا کہنا ہے کہ موٹرویز کی بندش کا مقصد عوام کی جان و مال کا تحفظ یقینی بنانا ہے، کیونکہ دھند کے دوران لین کی خلاف ورزی خطرناک حادثات کا سبب بن سکتی ہے۔
ترجمان کے مطابق قومی شاہراہ پر بھی دھند کی صورتحال تشویشناک ہے، جہاں سندر، مانگا منڈی، پھول نگر اور پتوکی کے علاقوں میں دھند چھائی ہوئی ہے۔
اس کے علاوہ اوکاڑہ، گیمبر، ساہیوال، چیچہ وطنی اور اقبال نگر کے علاقوں میں بھی دھند کے باعث حدِ نگاہ شدید متاثر ہے۔
موٹروے پولیس کے مطابق قومی شاہراہ پر حدِ نگاہ صفر سے 100 میٹر تک ریکارڈ کی گئی ہے، جس کے پیش نظر روڈ یوزرز کو لین ڈسپلن پر سختی سے عمل کرنے کی ہدایت کی گئی ہے۔
ترجمان نے شہریوں کو مشورہ دیا ہے کہ غیر ضروری سفر سے اجتناب کریں اور ممکنہ حد تک دن کے اوقات میں سفر کو ترجیح دیں۔ دھند میں محفوظ سفری اوقات صبح 10 بجے سے شام 6 بجے تک ہیں۔
موٹروے پولیس نے ڈرائیور حضرات کو فوگ لائٹس کے لازمی استعمال، تیز رفتاری سے گریز اور آگے چلنے والی گاڑی سے محفوظ فاصلہ برقرار رکھنے کی ہدایت کی ہے۔
کسی بھی قسم کی رہنمائی یا مدد کے لیے موٹروے پولیس ہیلپ لائن 130 پر رابطہ کرنے کی اپیل کی گئی ہے۔
