اداکار ہیں کوئی سیاستدان نہیں جو سماجی کام کریں، کرینہ کپور

شوبز ڈیسک  جمعـء 19 جون 2015
جو ہیروئنیں یہ کہتی ہیں کہ وہ سلمان خان کے ساتھ کام نہیں کرنا چاہتیں جھوٹ بولتی ہیں، کرینہ کپور  فوٹو: فائل

جو ہیروئنیں یہ کہتی ہیں کہ وہ سلمان خان کے ساتھ کام نہیں کرنا چاہتیں جھوٹ بولتی ہیں، کرینہ کپور فوٹو: فائل

ممبئی: 15برس سے بالی ووڈ میں اپنی اداکاری کی دھاک بٹھانے والی کرینہ کپور خان نے کہا ہے کہ ہم سیاستدان نہیں جو سماجی کام کریں، ہم اداکار ہیں اور ہمیں معاشرے کی تبدیلی کے لیے لیکچر دینے کی کوئی ضرورت نہیں۔

یہ بات انھوں نے اپنی آنے والی فلم ’’بجرنگی بھائی جان‘‘ کی تشہیری مہم کے دوران میڈیا سے گفتگو کرتے ہوئے کہی۔ کرینہ کپور کا کہنا تھا کہ ایک اداکار کے طور پر ہماری ذمہ داری ہوتی ہے کہ مداحوں کو سینما اسکرین پر وہ کچھ دکھائیں جس کی وہ خواہش رکھتے ہیں۔ ہمیں سماجی مسائل پر کسی کو کچھ بتانے کی کوئی ضرورت نہیں اور نہ ہی ان کے خاتمہ کے لیے کوئی لیکچردینے کی ضرورت ہے۔

یہ کام سیاستدانوں اور سماجی کارکنوں کا ہے اور ہم صرف اداکارہیں جن کا کام لوگوں کو تفریح فراہم کرنا ہوتا ہے۔ اپنی آنے والی فلم ’’بجرنگی بھائی جان‘‘ کے متعلق گفتگو کرتے ہوئے کرینہ کپور کا کہناتھا کہ یہ ایک مختلف فلم ہے جس میں میرا کردار چاندنی چوک کی ایک اسکول ٹیچرکا ہے جو سلمان خان کو پاکستان سے آنے والی بچی کے حوالے سے بہت مدد دیتا ہے۔ فلم کی کہانی بہت زیادہ گہرائی لیے ہوئے اور اس فلم کی عکسبندی کے دوران ملنے والے رسپانس سے مجھے معلوم ہوگیا ہے کہ لوگ اب بھی مجھے اور سلمان خان کو ایک ساتھ دیکھنا پسند کرتے ہیں۔

ایک سوال کے جواب میں کرینہ کا کہنا تھا کہ سلمان کو اس وقت سے جانتی ہوں جب وہ میری بہن کرشمہ کپور کے ساتھ کام کرتاتھا اس کی ہر فلم میں ایک نیا پن ہوتا ہے۔ وقت کے ساتھ اس میں ایک بڑا اسٹار ابھر کر سامنے آیا ہے اور وہ حقیقت میںبھارت کا سپر اسٹار بن چکا ہے اور اس وقت جو ہیروئنیں یہ کہتی ہیں کہ وہ سلمان خان کے ساتھ کام نہیں کرنا چاہتیں وہ جھوٹ بولتی ہیں کیونکہ ہر ہیروئن کی اندر کی خواہش ہے کہ وہ سلمان کے ساتھ نظر آئے اور ان کی طرف سے سلمان کے ساتھ کام کی خواہش نہ ہونے کا کہنا صرف توجہ حاصل کرنے کا بہانہ ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔