بھارتی صدر نے ڈش’’حمس‘‘ کی بجائے ’’حماس‘‘ کو پسندیدہ قرار دیدیا اسرائیل پریشان

پرناب مکھرجی اسرائیل کے دورے پر ہیں فوٹو: فائل

---

ISLAMABAD: اسرائیل کا دورہ کرنے والے بھارتی صدر پرناب مکھرجی نے حماس کو پسندیدہ قرار دے کراسرائیلی وزرا کو حیران و پریشان کردیا۔

ہوا کچھ یوں کہ بھارتی صدر پرناب مکھرجی اسرائیلی پارلیمنٹ میں اسرائیلی وزرا کے اجتماع سے خطاب کر رہے تھے، اس دوران وہ بہت بڑی غلطی کر بیٹھے جب انھوں نے یہ کہا کہ انہیں حماس بہت پسند ہے اس موقع پر موجود اسرائیلی وزرا کو حیرت کا شدید دھچکا لگا، دراصل بھارتی صدرسے یہ غلطی نادانستہ طور پر سرزد ہوئی۔ وہ کہنا کچھ اور چاہتے تھے مگرکہہ کچھ اور گئے۔

بھارتی صدر بیسن سے بنی ڈش ''حمس'' کی تعریف کرنا چاہتے تھے مگر اس ڈش کے نام کا تلفظ حماس سے ملتا جلتا ہے جس کے باعث ان کی زبان سے ''حماس'' نکل گیا۔ بھارتی صدر کے اس لفظ کی اصلاح اس وقت ہوئی جب انھوں نے اپنی تقریر کے دوران کہا کہ وہ اوران کا ملک بھارت بیسن سے بنا ''حمس'' بہت شوق سے کھاتے ہیں۔

تو جناب پرناب مکھرجی نے اپنے لفظ کی اصلاح بیسن کا ذکر کرکے کر تودیا، مگر اسرائیلی وزرا کی حالت غیر ضرور کردی خواہ تھوڑی دیر کیلیے ہی سہی۔

واضح رہے کہ ''حمس'' اسرائیل کی ایک مشہور ڈش ہے اور حماس اسرائیل مخالف تنظیم اور فلسطین کی آزادی کے لئے سرکرداں ہے۔