آپ کی تصاویرمیں سے بہترین تصویر منتخب کرنے والی ایپلی کیشن متعارف

ایپلی کیشن کی مدد سے البم میں موجود تمام تصاویر میں سے سب سے بہترین تصاویر کو ترتیب وار دیکھا جا سکتا ہے۔ فوٹو Phenom

---

ISLAMABAD: اپنی سیلفیز میں سے سب سے بہترین سیلفی منتخب کرنے میں آپ کو دشواری ہو تو یہ کام دی رول ایپ سے لیں جو اپنے خاص نظام کے ذریعے آپ کی تمام تصاویر میں سے سب سے بہترین تصویر کو الگ کر کے دکھاتی ہے۔

سماجی رابطوں کی ویب سائٹس جیسے کہ فیس بک اور انسٹاگرام وغیرہ پر اپنی تصاویر شیئر کرنا ہمارا روز مرہ کا معمول ہے۔ سب ہی کی کوشش ہوتی ہے کہ ہمیشہ اپنی اچھی تصویر ہی دوسروں کے سامنے پیش کریں۔ اچھی تصویر بنانے کے لیے ہم ہمیشہ ایک سے زائد بلکہ درجنوں تصاویر بناتے ہیں تب جا کر ان میں سے کوئی تصویر ہمیں شیئر کرنے کے لیے پسند آتی ہے لیکن اس اچھی تصویر کو تلاش کرنے کے لیے ہمیں البم میں موجود ساری تصاویر کو باری باری دیکھنا پڑتا ہے۔

اگر آپ اس کام کو آسان بنانا چاہتے ہیں تو آپ کے پاس ''دی رول'' ایپلی کیشن موجود ہونی چاہیے۔ یہ ایپلی کیشن آپ کے ہر البم میں موجود بہترین تصاویر کو سب سے اوپر اور نمایاں کر کے دکھاتی ہے۔ اس کے علاوہ یہ تمام تصاویر کو اپنے خاص الگورتھم سے آزمانے کے بعد ان کو ایک سے لے کر 100 تک کے درمیان نمبرز دیتی ہے۔ اس طرح جس تصویر کو زیادہ نمبرز ملیں آپ جان سکتے ہیں وہ بہترین اور شیئر کرنے کے قابل ہے۔

ایک جیسی سیلفیز میں سے بھی یہ بہترین سیلفی کو الگ کر کے دکھاتی ہے۔ اس طرح آپ کے لیے اپنی پروفائل پکچر منتخب کرنا آسان ہو جاتا ہے۔ یہ ایپلی کیشن فی الحال صرف آئی او ایس صارفین کے لیے دستیاب ہے لیکن جلد ہی اس کا اینڈروئیڈ ورژن بھی دستیاب ہو گا۔ آئی فون صارفین ایپ اسٹور سے ''دی رول'' لکھ کر اسے تلاش کر سکتے ہیں۔