آزاد کشمیر حکومت کا مقبوضہ وادی میں بھارتی مظالم کے خلاف کل یوم سیاہ منانے کا اعلان

یوم سیاہ کا مقصد انسانی حقوق کی تنظیموں کی توجہ مقبوضہ کشمیر میں بھارتی مظالم کی جانب مبذول کرانا ہے، ترجمان حکومت آزادکشمیر : فوٹو : فائل

---

آزاد کشمیر حکومت نے مقبوضہ وادی میں قابض بھارتی فوج کے مظالم کے خلاف کشمیریوں سے اظہار یکجہتی کے لیے کل یوم سیاہ منانے کا اعلان کیا ہے ۔

ترجمان حکومت آزاد کشمیر کے مطابق یوم سیاہ کا مقصد دنیا بھر کی سماجی اور انسانی حقوق کی تنظیموں کی توجہ مقبوضہ کشمیر میں بے گناہ کشمیریوں کی شہادتوں اور بھارتی مظالم کی جانب مبذول کرانا ہے اور کشمیری بھائیوں سے اظہار یکجہتی ہے۔

یوم سیاہ کے دوران نماز جمعہ کے بعد ریاست بھر میں احتجاجی مظاہرے کئے جائیں گے جن میں سول سوسائٹی ، انجمن تاجران ، سیاسی سماجی و مذہبی تنظیموں کے نمائندوں کے علاوہ عوام کی بڑی تعداد شرکت کرے گی۔

واضح رہے کہ مقبوضہ وادی میں گزشتہ 7 روز کے دوران قابض بھارتی فورسز کی فائرنگ سے اب تک 37 افراد شہید ہوچکے ہیں، وادی کے بیشتر علاقوں میں 6 روز سے کرفیو نافذ ہے اور حریت رہنماؤں کی اکثریت قید اور نظر بند ہے۔