وزیراعظم ملک میں فوری معاشی ایمرجنسی نافذ کریں تحریک انصاف

بیرونی قرضے برآمدات سے 400 گنا متجاوزہیں،ملکی معیشت کی اصلاح کیلیے مداخلت ناگزیر ہے فوٹو: فائل

---

تحریک انصاف نے وزیراعظم سے ملک میں معاشی ایمرجنسی کے فوری نفاذ کا مطالبہ کردیاہے۔

اس حوالے سے تحریک انصاف کے سینئر رہنما و رکن قومی اسمبلی اسد عمر کا کہنا ہے کہ وزیراعظم ملکی معیشت کے ڈوبتے جہاز کوبچانے کیلیے فوری تدبیر کریں۔ 2سال سے مسلسل نشاندہی کررہے ہیں کہ ڈار پالیسیاں پاکستان کوکہیں کا نہیں چھوڑیں گی،بیرونی قرضے ملکی برآمدات سے 400 گنا متجاوز ہیں۔ملکی معیشت کی اصلاح کے لیے فوری مداخلت ناگزیر ہے۔

نواز،ڈار بندوبست کی جانب سے نافذ کی گئی معاشی حکمت عملی میں نمایاں تبدیلیاں لائی جائیں۔اسد عمر نے کہا کہ گزشتہ چار برس کی ناکام پالیسیوں کا تسلسل قومی سلامتی پرخطرات کے بادل گہرے کررہا ہے۔ زرمبادلہ کے ذخائرمیں تیزی سے کمی جبکہ بیرونی قرضے آسمان تک بلند ہورہے ہیں۔آئی ایم ایف کے ساتھ معاہدے کی میعاد کے خاتمے کے بعد سے اب تک ساڑھے 4 ارب ڈالرزکی کمی آچکی ہے۔

اسد عمرنے یہ بھی کہا کہ ملکی معیشت کی حقیقی صورتحال ہمارے اندازوں سے کہیں ابتر ہے۔ ڈار پالیسیاں پاکستان کوبیرونی قرضوں کی خوفناک دلدل میں گہرا دھنسا رہی ہیں۔گزشتہ برس پاکستان کے بیرونی قرضوں کے حجم میں 9 ارب ڈالرز کا غیرمعمولی اضافہ ہو۔ نو ارب ڈالرز کے اضافے کیساتھ مجموعی بیرونی قرضہ 83 ارب ڈالرز کی خطرناک سطح کو پہنچ گیا۔