لاہور چڑیا گھر میں 3 زرافوں کا اضافہ

چڑیا گھر کے نئے مکینوں میں ایک نر اور دو مادہ زرافہ شامل ہیں فوٹو: فائل

---

چڑیا گھر میں تین سال کے طویل انتظار کے بعد بالاخر تین زرافوں کا اضافہ ہوگیا ہے.

لاہور چڑیا گھر میں مختلف جانوروں کے جوڑے مکمل کرنے اور نئے جانوروں کی خریداری پروگرام کے تحت تین زرافے لاہور چڑیا گھر لائے گئے ہیں، لاہور چڑیا کا واحد زرافہ 2015 میں مرگیا تھا جس کے بعد اس کا پنجرہ خالی تھا، ایک نر اور دو مادہ زرافے جنوبی افریقا سے منگوائے گئے ہیں جن کو ایک ماہ تک نگرانی میں رکھا جائے گا اور ان کے صحت مند رہنے کے بعد ہی ادائیگی کی جائے گی، 3 زرافوں کی مالیت ایک کروڑ 99 لاکھ روپے ہے، لاہور چڑیا گھر کےلیے مجموعی طورپر 11 کروڑ روپے مالیت کے جانوروں کی خریداری کی جارہی ہے جن میں ہاتھی، دریائی گھوڑا اور گینڈا بھی شامل ہے۔



ڈائریکٹرجنرل وائلڈلائف پنجاب خالد عیاض نے کہا کہ نئے جانوروں کی آمد سے لاہور چڑیا گھر کی رونقوں میں مزید اضافہ ہوگا، ہاتھی، گینڈا، دریائی گھوڑا اور چمپینزی بھی جلد لاہور چڑیا گھر کی رونق بڑھائیں گے، انہوں نے بتایا کہ لاہور چڑیا گھر سمیت لاہور سفاری زو اور پنجاب کے دیگر وائلڈ لائف پارکوں کے لیے بھی نئے جانور اورپرندے خریدے جارہے ہیں۔