میر واعظ عمر فاروق کا مسئلہ کشمیر پر عمران خان کے بیان کا خیر مقدم

 سری نگر: مقبوضہ کشمیر میں جدوجہد حق ارادیت کے سرگرم رہنما میر واعظ عمر فاروق نے تحریک انصاف کے سربراہ عمران خان کے بیان کا خیر مقدم کرتے ہوئے کہا کہ بھارت کو پاکستان کی پیشکش کا مثبت جواب دینا چاہیے۔

کشمیر میڈیا سیل کے مطابق حریت رہنما میر واعظ فاروق نے عام انتخابات میں کامیابی پر تحریک انصاف کو مبارک باد پیش کرتے ہوئے کہا ہے کہ عمران خان نے میڈیا سے اپنے پہلے خطاب میں کشمیری عوام کے درد و کرب کو بیان کیا ہے اور اس دیرینہ مسئلے کو بات چیت کے ذریعے حل کرنے کے اعلان کو خوش آئند اور مثبت قرار دیا ہے۔

حریت پسند رہنما میر واعظ عمر فاروق نے مزید کہا کہ کشمیر کے معاملے کو گفت و شنید کے ذریعے ہی حل کیا جا سکتا ہے۔ اب بھارت کو بھی عمران خان کی پیشکش پر ایک قدم آگے بڑھانا چاہیے اور کشمیر میں پائیدار امن کے لیے پاکستان کی مذاکرات کی پیشکش پر بھارت کو مثبت جواب دینا چاہیئے۔

Welcome the statement of PTI chief @ImranKhanPTI calling for resolution of #Kashmir dispute through dialogue in view of huge human cost of this long standing dispute especially being borne by the people of Kashmir. Hope the two neighbors give real peace a chance!

— Mirwaiz Umar Farooq (@MirwaizKashmir) July 26, 2018

واضح رہے کہ عام انتخابات میں بڑے پیمانے پر کامیابی حاصل کرنے کے بعد تحریک انصاف کے سربراہ عمران خان نے اپنی پہلی پریس کانفرنس میں مسئلہ کشمیر کو بھارت کے ساتھ بات چیت کے ذریعے حل کرنے کی خواہش کا اظہار کیا تھا۔