عباس کو بھی بھارت سے مقابلے کا بیتابی سے انتظار

قومی ٹیم کی فتح کیلیے پرامید ہوں، ٹیم کو ضرورت ہو تو ون ڈے بھی کھیل سکتا ہوں، پیسر فوٹو : فائل

---

محمد عباس بھی ایشیا کپ میں پاک بھارت مقابلے کے منتظر ہیں،پیسر کا کہنا ہے کہ گرین شرٹس کی فتح کے لیے پر امید ہوں، کاؤنٹی میں اچھا تجربہ حاصل ہوا، ٹیم کو ضرورت ہوئی تو محدود اوورز کی کرکٹ میں بھی ملک کی نمائندگی کے لیے تیار ہوں۔

تفصیلات کے مطابق ایک انٹرویو میں محمد عباس نے ایشیا کپ میں شریک پاکستان ٹیم کے لیے نیک خواہشات کا اظہار کرتے ہوئے کہا ہے کہ پاک بھارت مقابلے ہمیشہ ہی کانٹے دار اور ایک بڑا موقع ہوتے ہیں،بڑی بیتابی سے روایتی حریفوں کے میچ کا انتظار کررہاہوں،میری خواہش ہے کہ گرین شرٹس نہ صرف کہ بھارت کیخلاف کامیابی حاصل کریں بلکہ ٹائٹل بھی اپنے نام کرنے میں کامیاب ہوں۔

ایک سوال کے جواب میں محمد عباس نے کہا کہ ابھی تک میری توجہ ٹیسٹ کرکٹ پر مرکوز رہی ہے، طویل فارمیٹ میں اپنی کارکردگی سے مطمئن ہوں،تاہم رواں سیزن انگلش کاؤنٹی کھیل کر اچھا تجربہ حاصل کیا،لیسٹر شائر کی نمائندگی کرتے ہوئے 9ٹی ٹوئنٹی میچ کھیلنے کا بھی موقع ملا،اس دوران 7شکار کرنے کے ساتھ محدود اوورز کی کرکٹ میں اپنی صلاحیتیں نکھارنے کی کوشش بھی کی ہے،انگلینڈ کی کنڈیشنز میں بولرز کے لیے کارکردگی دکھانا آسان نہیں ہوتا،کافی تجربہ حاصل کرچکا ہوں۔

مختلف ماحول اور پچز پر خود کو کارآمد بولر ثابت کرنے کے لیے سخت محنت کررہا ہوں،محدود اوورز کی کرکٹ میں پاکستان کو میری خدمات درکار ہوئیں تو اس کے لیے تیار ہوں۔محمد عباس نے گلین میگرا کا زیادہ ٹیسٹ وکٹوںکا ریکارڈ توڑنے والے جیمز اینڈرسن کو خراج تحسین پیش کرتے ہوئے کہا کہ پیسر کا بڑا احترام کرتا ہوں، لارڈز ٹیسٹ کے موقع پر ان سے مشورہ بھی طلب کیا تھا۔