انوشکا شرما فلم ’’شدھی‘‘ سے آؤٹ کرینہ 10 سال بعد ہریتک کے ساتھ جلوہ گر ہوں گی

فلم ’’رفیوجی‘‘سے لیکر اب تک کیرئیر کے دوران مختلف کردار نبھائے،نئے تجربات کے لیے ہمیشہ رسک لیا ،32سالہ بالی وڈ اداکارہ کی گفتگو۔ فوٹو : فائل

---

فلمساز کرن جوہر کی نئی آنیوالی فلم ''شدھی ''میں اب انوشکا شرما کی جگہ کرینہ کپور کو لیڈی لیڈنگ رول میں کاسٹ کرلیا گیا ہے ۔

اس فلم میں کرینہ کپور اداکار ہریتک روشن کی ہیروئن بنیں گی ۔بالی وڈ ذرائع کا کہنا ہے کہ کرینہ کپور اور ہریتک روشن 10برس بعد پھر کسی پراجیکٹ میں ایک ساتھ کام کررہے ہیں ۔دونوں فنکار آنیوالی دیوالی کے موقع پر اس فلم کی ریلیز کی صورت سلور اسکرین پر اداکاری کے جوہر دکھائیں گے ۔فلم ساز کرن جوہر کی اس فلم کے ہدایت کار کرن ملہوترا ہیں ۔فلم کے لیے ہریتک روشن کا انتخاب بہت پہلے کیا جاچکا تھا۔2014 کو دیوالی پر سینماگھروں کی زینت بنائی جانے والی اس فلم کی اب نئی جوڑی کرینہ اور ہریتک روشن ہی ہونگے۔ادھر کرینہ کپور نے کہا ہے کہ ہر طرح کا کردار نبھایا ہے ،نئے کرداروں کے لیے رسک لیا جاتا ہے اور اس طرح کا رسک میں آئندہ بھی لیتی رہوں گی۔

اداکارہ کا کہنا ہے کہ ہر فلم میں مختلف نظر آنے کی خاطر اپنے ہر نئے کردار پر بڑی محنت کی ہے۔انھوں نے کہا کہ شادی اور فلموں کی کامیابی سمیت متعدد خوشیاں نصیب ہوئی ہیں،یہ سال بے شمار خوشیاں لایا۔ انھوں نے بتایا کہ2000 میں فلم ''رفیوجی '' سے لے کر اب تک مختلف کردار نبھائے اور ہر کردار کو مختلف انداز میں کرکے شائقین کے دل جیتے ہیں ۔ مداحوں کی محبت نے ہی مجھے اتنا زیادہ کام کرنے پر مجبور کیا ہے اور میں آج بھی تازہ دم نئی فلموں کے لیے کام کررہی ہوں۔32سالہ اداکارہ کا کہنا ہے کہ نئی فلم میںخاتون جرنلسٹ کا کردار بھی نبھارہی ہوں اس سے قبل بھی ٹی وی رپورٹر کا کردار نبھایا ہے تاہم اس فلم میں لیڈنگ لیڈی رول میں جلوہ گر ہونگی ۔ کرینہ کپور نے کہا ہے کہ شادی کے بعد اپنی روٹین کی شوبز سرگرمیاں جاری رکھے ہوئے ہوں ،سیف علی خان کے ساتھ بہت خوش ہوں۔ واضح رہے کہ 21ستمبر 1980 کو کپور خاندان کے اہم اداکار رندھیر کپور اور ببیتا کے گھر میں پیدا ہونے والی کرینہ کو پیار سے بے بو بھی کہا جاتا ہے ۔



کرینہ بھارت کے نامور فلمساز و اداکار راج کپور کی پوتی ہیں ،رشی کپور ان کے چچا ہیں ۔کرشمہ کپور بڑی بہن ہیں۔ اداکارہ نے گریجوایشن کے بعد کامرس کے مضمون رکھ لیا اور دو سال پڑھنے کے بعد لاء کالج میں قانون کی تعلیم حاصل کرنے لگیں ،اور ایک سال لاء پڑھنے کے بعد فیصلہ کیا کہ اداکاری کرنے کے منصوبے پر عمل کرنا ضروری ہے ۔کرینہ کپور نے اندھیری ایکٹنگ انسٹی ٹیوٹ میں داخلہ لے کر اداکاری سیکھنا شروع کردی۔ واضح رہے کہ اداکارہ کی 2000 ء میں پہلی فلم'' رفیوجی ''ریلیز ہوئی جس میں انھوں نے اپنی بہترین پرفارمنس پر فلم فیئر ایوارڈ جیتا۔

2001میں فلم ''مجھے کچھ کہنا ہے ''،''یادیں ''،''اجنبی ''، ''اشوکا''، ''کبھی خوشی کبھی غم'' 2002میں فلم ''مجھ سے دوستی کروگی ''، ''جینا صرف میرے لیے'' 2003میں فلم ''تلاش''، ''میں پریم کی دیوانی ہوں ''،''ایل اوسی کارگل'' 2004میں ''چمیلی''، ''یوو''، ''فدا''، ''اعتراض ''، ''ہلچل'' 2005 میں فلم ''بے وفا''، ''کیونکہ''، ''دوستی'' جب کہ 2006میں فلم ''36چائنا ٹاؤن''، ''چپکے چپکے''، ''اومکارا'' اور فلم ''ڈان '' میں پرفارم کیا ۔2007کے دوران فلم''کیا لو اسٹوری ہے''،''جب وی میٹ''میں کام کیا ،2008میں فلم ''ہلہ بول''،''تلاش''،''روڈ سائیڈ رومیو'' اور فلم ''گول مال ریٹرنز''میں اداکاری کے جوہر دکھائے۔ 2009 میں فلم ''لک بائی چانس''، ''بلیو''، ''کمبخت عشق'' اور فلم ''تھری ایڈیٹس'' میں فن کا جادو جگایا۔

2010میں فلم ''ملیں گے ملیں گے'' ، ''وی آر فیملی '' اور ''گول مال تھری''میں صلاحیتوں کا اظہار کیا۔ 2011 میں فلم ''باڈی گارڈ''،''را۔ون'' میں عمدہ کام کرکے داد پائی ، 2012میں اداکارہ کرینہ کپور نے فلم''اک میں اور اک تو''، ''راؤڈی راٹھور''، ''ہیروئن''، ''ایجنٹ ونود'' اور ''تلاش ''فلم میں جلوہ گر ہوئیں۔ کرینہ کپور کی نئی فلم ''ستاگرہ '' بھی ریلیز کے لیے تیار ہے۔ 2013 کو ہی اداکارہ کی فلم ''گوری تیرے پیار میں ''22نومبر کو سینما گھروں کی زینت بنائی جائے گی ۔اس فلم میں کرینہ عمران خان کے مدمقابل جلوہ گرہونگی ۔