ایم کیو ایم کے رہنماؤں کو دہشت گرد نشانہ بنا سکتے ہیں وزارت داخلہ کا انکشاف

کالعدم تنظیم کے دہشت گردوں نے متحدہ قومی موومنٹ کے رہنماؤں پر حملہ کرنے کا منصوبہ بنایا ہے۔ فوٹو: فائل

---

وفاقی وزارت داخلہ کی جانب سے انکشاف کیا گیا ہے کہ کالعدم تنظیم نے متحدہ قومی موومنٹ کے رہنماؤں پر حملے کی منصوبہ بندی کر رکھی ہے۔

وزارت داخلہ کے کراسز مینجمنٹ سیل نے حکومت سندھ کو مراسلہ بھیجا ہے جس میں کہا گیا ہے کہ کالعدم تنظیم کے دہشت گردوں نے متحدہ قومی موومنٹ کے رہنماؤں پر حملہ کرنے کا منصوبہ بنایا ہے، مراسلے کے مطابق جن رہنماؤں کو ٹارگٹ کیا جا سکتا ہے ان میں ڈاکٹر فاروق ستار، نبیل گبول اور فیصل سبزواری شامل ہیں، دہشت گرد تینوں رہنماؤں کو ملک کے کسی بھی حصے میں نشانہ بنا سکتے ہیں۔

مراسلے کی روشنی میں حکومت سندھ نے پولیس اور سیکیورٹی نافذ کرنے والے اداروں کو تینوں رہنماؤں کی سیکیورٹی سخت کرنے کے احکامات جاری کر دیئے ہیں۔ حکومت سندھ نے کہا ہے کہ تینوں رہنماؤں کی سیکیورٹی کو فول پروف بنایا جائے تاکہ کسی بھی ناخوشگوار واقعے سے پیشگی طور پر نمٹا جا سکے۔