2 برس قبل پاکستان ٹور سری لنکن کرکٹرز بدستور ’’بونس‘‘ سے محروم

پی سی بی نے ٹیم بھیجنے کے لیے پہلے ہی رقم ایس ایل سی کو اداکردی تھی فوٹو: فائل

---

2 برس قبل پاکستان آنے والے سری لنکن کرکٹرز بدستور ''بونس'' سے محروم ہیں جب کہ لاہور میں کھیلے گئے ایک ٹوئنٹی 20 میچ کیلیے فی کس 20 لاکھ روپے دینے کا وعدہ ابھی تک وفا نہیں ہوا۔

سری لنکن میڈیا کی ایک رپورٹ میں انکشاف کیا گیا ہے کہ اکتوبر 2017 میں ایک ٹوئنٹی 20 میچ کیلیے لاہور آنے والے آئی لینڈرز کو ابھی تک وہ اضافی معاوضہ ادا نہیں کیا گیا جس کا وعدہ کیا گیا تھا۔ یہ ٹیم تھشارا پریرا کی قیادت میں پاکستان آئی تھی۔ اس وقت بھی پی سی بی اور پاکستانی حکومت نے سری لنکن پلیئرز کو بہترین سیکیورٹی فراہم کی تھی۔

رپورٹ میں یہ بھی دعویٰ کیا گیا کہ ٹیم بھیجنے میں پس پردہ دونوں ممالک کے درمیان سیاسی سطح پر رابطے ہوئے اور سری لنکا نے سیاسی ایڈوانٹیج کیلیے ہی فیصلہ کیا تھا۔ اس ٹور کیلیے پی سی بی نے بھی سری لنکن بورڈ کو خطیر رقم بھیجی تھی، جس کی بنیاد پر سابق اور موجودہ بورڈ صدر نے بلواسطہ یا بلاواسطہ کھلاڑیوں پر دورے کیلیے دباؤڈالا تھا۔

اس وقت کھلاڑیوں سے کہا گیا تھا کہ پی سی بی سے ملنے والی رقم کا 50 فیصد حصہ ان میں برابر تقسیم کیا جائے گا مگر یہ رقم ادا کی گئی نہ ہی اس بارے میں ان سے پھر بات ہوئی، ایس ایل سی نے اپنی سابق ایگزیکٹیو کمیٹی سے پاکستان جانے والے کھلاڑیوں کو فی کس 20 لاکھ روپے ادا کرنے کی منظوری بھی لی تھی مگر اس کے بعد اس معاملے میں کوئی بھی پیشرفت نہیں ہوئی۔