جس تحریک کو روز نئے میثاق کی ضرورت پڑے اُس کا کوئی مستقبل نہیں شبلی فراز

شاہد خاقان آبائی حلقے سے ہاریں تو دھاندلی اور لاہور سے جیتیں تو انتخابات شفاف؟ قوم سیاسی منافقت سے بے زار ہوگئی (فوٹو : فائل)

---

ISLAMABAD: وزیر اطلاعات سینیٹر شبلی فراز نے کہا ہے کہ جس تحریک کو آئے روز نئے میثاق کی ضرورت پڑتی ہو اُس کا کوئی مستقبل نہیں، اگر ملک میں آئینی و جمہوری نظام نہیں ہے تو اپوزیشن جماعتیں گلگت بلتستان کے انتخابات کیوں لڑ رہی ہیں؟

اپنے بیان میں انہوں نے کہا کہ جس تحریک کو آئے روز نئے میثاق کی ضرورت پڑتی ہو اُس کا کوئی مستقبل نہیں، ظاہر ہوا کہ یہ نہیں جانتے کہ کرنا کیا ہے؟ یہ اندھیرے میں تیر چلا رہے ہیں، ہوس اقتدار میں نیا میثاق بناکر عوام کو بیوقوف بنانے کی کوشش ہر گز کامیاب نہیں ہوگی۔

وفاقی وزیر شبلی فراز نے کہا کہ مولانا صاحب معاشی بحران پیدا کرنے والے آپ کے دائیں بائیں کھڑے تھے، اُن سے پوچھتے، ایسا کیوں کیا؟ پاکستان درست سمت میں جارہا ہے اور آج معاشی اشاریے مثبت ہیں، مولانا صاحب! حقیقی آئینی جمہوری نظام نہیں تو پھر آپ قومی اسمبلی سے باہر اور آپ کا بیٹا رکن کیسے ہیں؟

یہ پڑھیں : فوجی قیادت کا نام لینے کی حمایت کرتا ہوں، مولانا فضل الرحمان

انہوں نے مزید کہا کہ آئینی جمہوری نظام نہیں ہے تو اپوزیشن جماعتیں گلگت بلتستان کے انتخابات کیوں لڑ رہی ہیں؟ شاہد خاقان عباسی آبائی حلقے سے ہاریں تو دھاندلی اور لاہور سے جیتیں تو انتخابات شفاف؟ قوم سیاسی منافقت اور دوغلے پن سے بے زار ہوچکی ہے۔