دورانِ سفر پلیئرز کورونا کی زد میں آئے، وسیم خان کو خدشہ

اسپورٹس رپورٹر  جمعرات 3 دسمبر 2020
شاہینز کا نیوزی لینڈ اے سے پہلا میچ منسوخ کیے جانے کا امکان ہے، سی ای او۔ فوٹو: فائل

شاہینز کا نیوزی لینڈ اے سے پہلا میچ منسوخ کیے جانے کا امکان ہے، سی ای او۔ فوٹو: فائل

 لاہور: پی سی بی کے سی ای او وسیم خان نے سفر کے دوران پلیئرز کے کورونا کی زد میں آنے کا خدشہ ظاہر کیا ہے۔

برطانوی خبر رساں ایجنسی سے بات چیت کرتے ہوئے پی سی بی کے چیف ایگزیکٹیو وسیم خان نے کہاکہ ٹیم کی نیوزی لینڈ روانگی سے قبل تمام کھلاڑیوں اور کوچنگ اسٹاف کے کورونا ٹیسٹ شوکت خانم اسپتال سے کروائے گئے تھے،نتائج پر کسی قسم کے شک و شبہے کی قطعاً گنجائش نہیں۔

انھوں نے کہا کہ ممکن ہے طویل سفر کے دوران کھلاڑی وائرس کی زد میں آگئے ہوں لیکن یہ بات درست نہیں ہے کہ نیوزی لینڈ میں پروٹوکول کی خلاف ورزی کی وجہ سے انھیں کورونا ہوا ہے۔

وسیم خان سے جب پوچھا گیا کہ اتنے سخت قواعد و ضوابط میں کیا یہ دورہ کرنا درست فیصلہ تھا؟ تو انھوں نے جواب دیا کہ ویسٹ انڈین ٹیم بھی نیوزی لینڈ میں ہے،اس کے کھلاڑیوں نے بھی اسی ماحول میں 14 روز کا قرنطینہ مکمل کیا تب ہی انھیں ٹریننگ کی اجازت ملی ہے۔

ایک سوال پر سی ای او نے کہا کہ فی الحال اس دورے کو کوئی خطرہ لاحق نہیں لیکن ہم صورتحال کا جائزہ لے رہے ہیں، امکان ہے کہ پاکستان شاہینز کا نیوزی لینڈ اے کے خلاف 10دسمبر کو شیڈول پہلا میچ منسوخ کر دیا جائے،اس ٹیم کیلیے منتخب کیے گئے کھلاڑی بھی قرنطینہ میں ہیں، جب وہ باہر آئیں گے تو ان کے لیے بغیر کسی پریکٹس کے کھیلنا آسان نہ ہو گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔