سندھ ہائی کورٹ کا گٹر کے پانی سے سبزیاں اگانے کے خلاف فائنل آپریشن کا حکم

ہر بار بتایا جاتا ہے کہ ایکشن لیا، اس بار فائنل ایکشن لیں، جسٹس مظہر، سبزیوں کے لیے بورنگ کنکشنز بھی ختم کرنے کا حکم (فوٹو : فائل)

---

سندھ ہائی کورٹ نے زہریلے اور گٹر کے پانی سے سبزیاں اگانے سے متعلق درخواست پر تمام بورنگ کنکشن فوری ختم کرنے اور ڈی سی ملیر، کورنگی کو فائنل ایکشن لینے کا حکم دے دیا۔

جسٹس محمد علی مظہر اور جسٹس امجد علی سہتو پر مشتمل دو رکنی بینچ کے روبرو زہریلے اور گٹر کے پانی سے سبزیاں اگانے سے متعلق درخواست پر سماعت ہوئی۔

ڈپٹی کمشنر کورنگی نے بتایا کہ ملیر ندی سے بورنگ کے 50 کنکشن ختم کردیے، بعض افراد بورنگ کا پانی صنعتوں کو فروخت کر رہے تھے۔ عدالت نے ریمارکس دیئے کہ ملیر ندی کسی کی ملکیت نہیں، پانی کیسے استعمال کیا جاسکتا ہے؟

ڈی سی ملیر نے بتایا کہ 280 ایکٹر زمین سے گٹر کے پانی کی سبزیاں ختم کرائیں، ملیر ندی سے زمین کا پانی بورنگ کے ذریعے چوری کرنے کا انکشاف ہوا۔ اس بیان پر عدالت نے تمام بورنگ کنکشن فوری ختم کرنے کا حکم جاری کردیا اور ڈی سی ملیر و کورنگی کو فائنل ایکشن لینے کی ہدایت کردی۔

عدالت نے ریمارکس دیئے کہ گٹر پانی سے اگنے والی سبزیوں سے متعلق حتمی ایکشن لیں۔ جسٹس محمد علی مظہر نے ریمارکس دیئے ہر مرتبہ بتایا جاتا ہے کہ ایکشن لیا، فائنل ایکشن لیں اور حتمی رپورٹ پیش کریں۔

عدالت نے زہریلی سبزیوں سے متعلق تمام درخواستیں یکجا کرتے ہوئے ڈی سی ملیر، کورنگی سے 17 فروری تک جامع جواب طلب کرلیا۔