معروف پاکستانی گلوکار اسد عباس انتقال کر گئے

مرحوم گردوں کے عارضے میں مبتلا تھے اور اسپتال میں زیر علاج تھے، طبعیت بگڑنے پر جانبر نہ ہوسکے

ویب ڈیسک August 15, 2023

گلوکار اسد عباس کی تصاویر (ٖفوٹو : انٹرنیٹ)

پاکستان کے معروف گلوکار اسد عباس گردے ناکارہ ہونے کے سبب انتقال کرگئے۔

ایکسپریس نیوز کے مطابق معروف گلوکار اسد عباس کافی عرصے سے گردوں کے عارضے میں مبتلا تھے اور ان کا علاج جاری تھا، وہ کئی روز سے اسپتال میں زیر علاج تھے جہاں طبیعت بگڑنے کے سبب وہ جانبر نہ ہوسکے۔ ان کے اہل خانہ نے انتقال کی تصدیق کی ہے۔

قبل ازیں اداکار عدنان صدیقی نے ان کے علاج کے لیے اپیل بھی کی تھی جب کہ گلوکار اسد عمر کی ایک ویڈیو پوسٹ بھی وائرل ہوئی تھی جس میں انہوں نے اپنی بیماری کے بارے میں مکمل طور پر بتایا تھا۔

یہ بھی پڑھیں : عدنان صدیقی کی گلوکار اسد عباس کے علاج کیلئے مدد کی اپیل

نگران وزیر اعلی پنجاب محسن نقوی نے گلوکار اسد عباس کے انتقال پر دکھ اور افسوس کا اظہار کیا ہے اور کہا ہے کہ اسد عباس کے انتقال پر دلی صدمہ ہوا، اللہ تعالٰی مرحوم کی روح کو جوار رحمت میں جگہ دے اور لواحقین کو صبر جمیل عطا فرمائے۔

اسی طرح صوبائی وزیر اطلاعات و ثقافت عامر میر نے بھی گلوکار اسد عباس کے انتقال پر اظہار افسوس کرتے ہوئے کہا ہے کہ مرحوم نے بہت کم عمری میں شہرت حاصل کی، مرحوم کے علاج کے لیے حکومت جو کرسکی وہ کیا، حکومت پنجاب مرحوم کے اہل خانہ کے دکھ اور غم کی اس گھڑی میں ان کے ساتھ ہے۔